Jizzax prokuraturasi Zarbdor hokimligi mansabdorlariga jinoiy ish ochdi

Jizzax viloyatining Zarbdor tumanida baliqchilik uchun ajratilgan yerdan boshqa maqsadlarda foydalangan xususiy korxona aniqlandi, deb xabar beradi viloyat hokimligi matbuot xizmati.

Ma’lum qilinishicha, Jizzax viloyati prokuraturasi tomonidan mavjud sun’iy baliqchilik havzalarida “Baliqchilik tarmog‘ini yanada rivojlantirishning qo‘shimcha chora-tadbirlari to‘g‘risida”gi prezident qarori ijrosi yuzasidan tekshirish jarayonlari o‘tkazilgan.

Mazkur tekshirish jarayonida aniqlanishicha, Zarbdor tuman hokimining tegishli qarori bilan Ch.N. rahbarligidagi “M.P” xususiy korxonasiga baliqchilikni rivojlantirish maqsadida sun’iy havza yaratish uchun jami 20 gektar suvli yer maydoni ijaraga ajratilgan.

Tuman hokimligi mas’ul mansabdor shaxslari tomonidan monitoring ishlari o‘tkazilmagani oqibatida “M.P” xususiy korxona rahbari Ch.N. o‘ziga ajratilgan yerdan tashqari qishloq xo‘jaligi mahsulotlari yetishtirish uchun mo‘ljallangan 48 ball bonitetiga ega bo‘lgan jami 9 gektar yer maydonini noqonuniy egallab, davlat va jamiyat manfaatlariga 4,4 milliard so‘m miqdorda zarar yetkazgani oshkor bo‘lgan.

Holat yuzasidan Zarbdor tuman hokimligi mas’ul mansabdor shaxslariga nisbatan Jinoyat kodeksining 205-moddasi (hokimiyat yoki mansab vakolatini suiiste’mol qilish) hamda “M.P” xususiy korxona rahbari Cho‘rtanboy Nahangboyevga nisbatan 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) bo‘yicha jinoyat ishi qo‘zg‘atilib, tergov harakatlari olib borilmoqda.

Avvalroq Qarshi shahrining amaldagi va sobiq hokimi 156 milliard so‘m bo‘lgan yerni noqonuniy berib yuborgani ma’lum bo‘lgandi.