Zarafshon milliy tabiat bog‘i Ekologiya qo‘mitasi tizimiga o‘tkazilishi mumkin

Ekologiya va atrof-muhitni muhofaza qilish davlat qo‘mitasi “Zarafshon milliy tabiat bog‘i faoliyati va Sudochye-Akpetki davlat buyurtma qo‘riqxonasining ayrim masalalari to‘g‘risida”gi Vazirlar Mahkamasi qarori loyihasini muhokamaga qo‘ydi.

Qaror loyihasida Ekologiya va atrof-muhitni muhofaza qilish davlat qo‘mitasi, O‘rmon xo‘jaligi davlat qo‘mitasi va Samarqand viloyat hokimligining Samarqand viloyati Jomboy va Bulung‘ur tumanlari hududida joylashgan, umumiy maydoni 2426,2 gektar bo‘lgan Zarafshon milliy tabiat bog‘ini shtat birliklari va moddiy-texnik bazasi bilan birga hamda moliyalashtirish tartibini saqlab qolgan holda O‘rmon xo‘jaligi davlat qo‘mitasi tasarrufidan Davlat ekologiya qo‘mitasi tizimiga o‘tkazish ko‘zda tutilgan.

Respublika komissiyasi ikki oy muddatda:

• Zarafshon milliy tabiat bog‘ining barcha mol-mulki va boshqa obyektlarini, shu jumladan, uning pitomnigidagi hayvonlarini xatlovdan o‘tkazishi;
• Zarafshon milliy tabiat bog‘ini shtat birliklari va moddiy-texnik bazasi bilan birga hamda amaldagi moliyalashtirish tartibini saqlab qolgan holda belgilangan tartibda Davlat ekologiya qo‘mitasiga qabul qilinishi-topshirilishini ta’minlashi kerak.

Shuningdek, 2022-yil yakuniga qadar Zarafshon milliy tabiat bog‘i hududini qonunchilik talablari asosida uning qo‘riqxona, rekreatsiya va xo‘jalik maqsadida foydalanish zonalari chegaralari belgilanadi; Fanlar akademiyasi bilan birgalikda tabiiy obyektlar monitoringi yuritilishi va ilmiy-tadqiqot ishlarining tashkil etiladi.

Bundan tashqari, Buxoro bug‘ulari uchun yashash joylarini yaxlit saqlash, daryoda suv sathining pasayishi natijasida qirg‘oqlaridagi to‘qayzorlarga bo‘layotgan salbiy ta’sirning oldini olish maqsadida milliy tabiat bog‘i hududini kengaytirish bo‘yicha Vazirlar Mahkamasiga asoslangan taklif kiritiladi.

Davlat ekologiya qo‘mitasining budjetdan tashqari jamg‘arma mablag‘lari hisobidan Davlat soliq qo‘mitasi huzuridagi Kadastr agentligi bilan birgalikda:

• Zarafshon milliy tabiat bog‘i yer uchastkalari, boshqa ko‘chmas mulk obyektlari hujjatlarini belgilangan tartibda rasmiylashtirilishi va davlat ro‘yxatidan o‘tkazilishi;
• Sudochye-Akpetki davlat buyurtma qo‘riqxonasi yer uchastkalarini kadastr hujjatlariga tegishli o‘zgartirishlar kiritilishi ta’minlanadi.

Avvalroq Vazirlar Mahkamasining “O‘rmon fondi yerlarida muhofaza etiladigan tabiiy hududlarni tashkil etish bilan bog‘liq qo‘shimcha chora-tadbirlar to‘g‘risida”gi qarori qabul qilingandi. “Muhofaza etiladigan tabiiy hududlar to‘g‘risida”gi qonunga muvofiq, Qoraqalpog‘iston, Namangan, Samarqand va Surxondaryo viloyatlari o‘rmon fondi yerlarida “Orolqum”, “Pop”, “Omonqo‘ton”, “Yuqori To‘palang” va “Bobotog‘” milliy bog‘lari tashkil etiladi.