Qashqadaryo viloyatining G‘uzor tumanida 37 yoshli fuqaro o‘z joniga qasd qilgani, uning Yoshlar ishlari agentligining mahalladagi vakili ekani xabar berilgandi. G‘uzor tumani hokimi Bekzod Suyunov “Daryo” muxbiri bilan suhbatda mazkur holat haqida fikr bildirdi.
“Marhumning yaqinlariga sabr tilab, shuni alohida ta’kidlamoqchimanki, uning muammolari bo‘lgandir. Balki shaxsiy hayotida, balki ishida. Ammo achinarlisi, u muammolariga yechim sifatida aynan shu yo‘lni tanlagan va irodasizlikka yo‘l qo‘ygan”, — deydi tuman hokimi voqea haqida o‘z fikrini bildirar ekan.
Qo‘shimcha qilinishicha, marhum bir necha yil davomida “Sovbog‘” mahalla fuqarolar yig‘ini mas’ul kotibi, mahalla raisining obodonlashtirish, tomorqa va tadbirkorlik masalalari bo‘yicha o‘rinbosari lavozimida ishlagan.
“U mahalla tizimini yaxshi tushunishi, mahallaning yosh-u qarisini tanishi va namunali xulqi uchun 2022-yilda mahallada yoshlar yetakchisi lavozimiga tayinlangan. Mehnat faoliyati davomida mahalladagi yoshlarning bo‘sh vaqtini mazmunli o‘tkazishda, rahbariyati tomonidan berilgan topshiriqlarni o‘z vaqtida bajarishda ancha faol bo‘lgan. Ming afsuski, bu holat barchamizni chuqur qayg‘uga soldi. Marhumning yaqinlariga tuman hokimligi nomidan chuqur hamdardlik bildiraman”, — dedi Bekzod Suyunov.
“Daryo” muxbirining aniqlashtirishicha, marhum oilada eng kichik farzand bo‘lgan. Voqea yuzasidan tergovga qadar tekshiruv harakatlarini olib borgan tuman prokuraturasi marhumning yaqinlari — ikki akasi, xotini va onasining fikrini o‘rgangan.
Marhumning yaqinlari uning so‘nggi paytda spirtli ichimlikka ruju qo‘yganini aytgan.
Jumladan, har ikki akasi ham ukasi so‘nggi paytlarda ishga ham bormay, ichimlik ichishga ruju qo‘yganini onasi orqali bilganini aytib, bir necha marotaba tanbeh berganini bildirgan.
Marhumning turmush o‘rtog‘i esa so‘nggi paytlarda ularning xonadoniga qarzini so‘rab keluvchilar ko‘payganini, marhum turmush o‘rtog‘i qarzi ko‘pligini aytsa-da, aynan qancha qarzi borligini aytmaganini ma’lum qilgan.
Marhumning xotini, shuningdek, eri 2022-yilning 11-aprel kuni kechasi soat bir-ikkida uyiga mast holda, oyoq kiyimi o‘rnida “tapochka”da, telefonsiz qaytganini bildirgan. Qolaversa, marhum uyidan 2022-yilning 12-aprel kuni tonggi soat 08:00 da telefoni va oyoq kiyimni olib kelishini aytib, chiqib ketganicha qaytmagan. Yaqinlari uning jasadini qo‘shnisining hech kim yashamaydigan uyi og‘ilxonasidan 13-aprel kuni soat 18:00 ga yaqin vaqtda topgan.
Eslatib o‘tamiz, avvaroq Bosh prokuratura holat bo‘yicha G‘uzor tumani prokuraturasi tomonidan tergovga qadar tekshiruv harakati olib borilayotganini ma’lum qilgani “Daryo” manbasi esa 2022-yilning 17-aprel kuni ish yuzasidan jinoyat ishi qo‘zg‘atish rad etilganini aytgani xabar berilgandi.
Izoh (0)