Afg‘oniston “O‘zbekiston temir yo‘llari” AJ bilan hamkorlikni to‘xtatishni rejalashtirayotgani haqidagi OAVda tarqalgan xabarlarni rad etdi. Bu haqda “O‘zbekiston temir yo‘llari” matbuot xizmati xabar berdi.
Ma’lum qilinishicha, Termizda 12—14-aprel kunlari “O‘zbekiston temir yo‘llari” boshqaruv rahbarlarining Afg‘oniston temir yo‘llari boshqarmasi boshlig‘i Baxtulrahmon Sharafat boshchiligidagi delegatsiyasi bilan uchrashuvi bo‘lib o‘tdi.
Unda Afg‘oniston tomoni O‘zbekistonga ikki tomonlama munosabatlarni mustahkamlash, Afg‘onistonga/Afg‘onistondan yuk tashish hajmini oshirish bo‘yicha ko‘rilayotgan chora-tadbirlar va sa’y-harakatlar, shuningdek, yuklarni o‘z vaqtida qayta ishlashda ko‘rsatilayotgan yordam uchun minnatdorlik bildirdi.
Uchrashuvda, shuningdek, Afg‘oniston “O‘zbekiston temir yo‘llari” bilan hamkorlikni to‘xtatishni rejalashtirayotgani haqida OAVda tarqalgan xabarlarni rad etgan.
Bundan bir necha kun avval Afg‘oniston nashrlari mamlakat temiryo‘llarini boshqarish bo‘yicha shartnomalarni qayta ko‘rib chiqishni rejalashtirayotgani haqida xabar e’lon qilgandi. Unda shartnomalar mamlakat manfaatlari hisobga olinmagan holda tuzilgani va hozirda har yili millionlab dollarlar xorijiy kompaniyalarga ketib qolayotgani aytilgan.
16-aprel kuni TOLO News O‘zbekiston 10-maydan so‘ng Hayraton–Mozori Sharif temiryo‘l boshqaruvini Afg‘onistonga topshirishini xabar qilgandi.
“O‘zbekiston temir yo‘llari” xabarida aytilishicha, aksincha, Baxtulrahmon Sharafat ikki tomonlama hamkorlikni mustahkamlash va uni yanada kengaytirish rejasini alohida ta’kidladi. Afg‘oniston tomoni “O‘zbekiston temir yo‘llari” tarkibiga kiruvchi “So‘g‘diyona trans” sho‘ba korxonasining Hayraton–Mozori-Sharif temiryo‘l liniyasi ekspluatatsiyasi bo‘yicha 2021-yildan buyon amalga oshirib kelayotgan ishlaridan to‘liq mamnunligini bildirgan.
Muzokaralar davomida Mozori Sharif—Kobul—Peshovar temiryo‘li qurilishi loyihasini amalga oshirishni jadallashtirish masalasi ham muhokama qilingan.
Izoh (0)