Bosh prokuratura Qashqadaryo viloyatining G‘uzor tumanida 37 yoshli fuqaro o‘zini osib qo‘ygani, holat yuzasidan prokuratura tomonidan tergovga qadar tekshiruv harakatlari boshlanganini ma’lum qildi.
“Daryo” voqeaning qo‘shimcha tafsilotlarini ham o‘rgandi.
Ma’lum qilinishicha, voqea 2022-yilning 13-aprel kuni sodir bo‘lgan.
“Daryo” muxbiri bilan suhbatlashgan manba marhumning o‘z joniga qasd qilishiga katta miqdordagi qarzdorligi sabab bo‘lgan bo‘lishi mumkinligini aytdi.
“U o‘sha kuni uyidan ishga chiqib ketayotganda xotiniga qarzi judayam ko‘payib ketganini, pul berganlar pulini so‘rab tinchlik bermayotganini aytgan. Uning o‘limiga katta miqdordagi qarzdorlik sabab bo‘lgan bo‘lishi ham mumkin”, — deydi manba.
Yoshlar ishlari agentligining viloyat boshqarmasi boshlig‘i Temur Poyonov marhumning o‘z joniga qasd qilishiga, uning ishdan bo‘shatilgani sababligi haqidagi ma’lumotni rad etdi.
“U hozirgi paytgacha ham ishdan bo‘shamagan. Hozir, 17-aprel kechki payt soat 20:30 bo‘lgan bo‘lsa, hozir ham u bizning ishchimiz sifatida ro‘yxatda turibdi. Uning ishdan bo‘shatilgani haqida ma’lumot noto‘g‘ri”, — deydi Temur Poyonov.
Temur Poyonovning ma’lumot berishicha, marhum Yoshlar ishlari agentligining “Sovbog‘” mahallasidagi vakili sifatida 2021-yilning noyabr oyidan beri ishlab kelgan.
“Kotib sifatida ishlagan paytida qo‘ni-qo‘shnilaridan, tanish-bilishlaridan arzimagan pul qarz olgan. Bu holat ko‘p bo‘lgani bois, qarz beruvchilar soni ham ko‘paygan va undan pul talab qilingan holat ham ko‘paygan. Bu esa uning ruhiy holatiga ta’sir qilgan bo‘lishi mumkin”, — dedi “Daryo” manbasi.
Bosh prokuratura axborotida marhumaning uch nafar farzandi borligi, u qo‘shnisining yashamaydigan xonadonida o‘zini-o‘zi osib qo‘ygani xabar berilgan. Shuningdek, tekshirish davomida marhum oxirgi vaqtlarda ko‘p spirtli ichimlik iste’mol qilishga ruju qo‘ygani qo‘shimcha qilingan.
Marhumning o‘lim sababiga aniqlik kiritish maqsadida sud-tibbiy ekspertizasi tayinlangan.
“Daryo” manbasining qo‘shimcha qilishicha, G‘uzor tumani prokuraturasi 2022-yilning 17-aprel kuni mazkur voqeada biror bir kishining harakatida jinoyat alomatlari yo‘qligini inobatga olib, ish yuzasidan jinoyat ishi qo‘zg‘atishni rad etgan.
Avvalroq Qashqadaryo viloyatining Nishon tumani “Oydin” mahallasida yashovchi voyaga yetmagan maktab o‘quvchisi 22-mart kuni o‘zini osib o‘ldirgani, Angren shahrida IIB xodimi ham o‘z joniga qasd qilgani, Surxondaryoda esa tuman IIB boshlig‘ining sobiq o‘rinbosari o‘zini osib, joniga qasd qilgani xabar berilgandi.
Izoh (0)