Шавкат Мирзиёев бошчилигида 15 апрель куни озиқ-овқат маҳсулотлари ишлаб чиқаришни кўпайтириш орқали бозорларда нарх-наво барқарорлигини таъминлаш ҳамда бизнесни қўллаб-қувватлаш бўйича қўшимча шароитлар яратишга бағишланган йиғилиш бўлиб ўтди. Йиғилишда вилоятларда озиқ-овқат бозорида нархлар барқарорлигини сақлашнинг имкони борми, деган савол Бухоро, Сурхондарё ва Хоразм ҳокимларига берилди.
Хоразм ҳокими Фарҳод Эрманов президентга қилинаётган ишлар юзасидан ҳисобот берди. Бу лавҳа «Ўзбекистон 24» телеканалининг «Менимча» кўрсатувида маълум қилинди.
«Йилнинг охиригача 560 гектар ерда иссиқхоналаримиз бўлади. Буларда етиштирилган маҳсулотлар, асосан, экспортга йўналтирилади. Шу билан бирга, ички бозор ҳам таъминланади. Бу ҳам бизга қўшимча имконият, иш ўрни ҳамда экспорт маҳсулот тури бўлди», — деди Хоразм вилояти ҳокими Фарҳод Эрманов.
Президент ҳокимнинг ҳисоботини қўлга олиб, буни қандай тайёрлагани билан қизиқди.
«Ҳисоб-китоб бўйича бизга ёзиб бергансан, тўғрими, мана ўзинг қўл қўйиб. Буни қандай ёздинг, ичига кириб, ўқиб ёздингми?», — дея сўради Шавкат Мирзиёев. Бунга жавобан ҳоким:
«Қўлингиздаги ҳар бир рақамнинг тагида ҳаммасининг (масъулларнинг) исм фамилияси ёзилган. Ҳар бир туман ҳокимининг ўзига йўналишлар бўйича белгилаб, вазифа ташаб, шуларнинг ҳисоб-китобини қилиб ишладик», — деди Эрманов.
Давлат раҳбари қилинадиган ишлар ва бозордаги кутилган нарх-наво ҳақида маҳаллагача хабардор қилиш кераклигини айтди.
Мавзуга доир:
- Ўзбекистон бозорларидаги асосий озиқ-овқат маҳсулотларининг нархи эълон қилинди
- «Айбдорлар сўзсиз жавобгарликка тортилади». Шавкат Мирзиёев бюрократия ва коррупцияга йўл қўйганлар кечирилмаслигини маълум қилди
- «Тадбиркорлардан талаб катта, лекин амалда ҳали натижа йўқ». Шавкат Мирзиёев ер участкларини аукционга чиқариш жараёни сустлигини танқид қилди
Изоҳ (0)