Ijtimoiy tarmoqlarda O‘zbekiston Qirg‘izistonning Botken viloyatida 3,5 million dollarlik maktab qurib bergani ko‘plab muhokamalarga sabab bo‘ldi. O‘zbekistonning o‘zida maktab yetishmayotgan bir vaqtda, qo‘shni davlatlar qurib berayotgani tanqid ham qilindi. AOKAda bo‘lib o‘tgan matbuot anjumanida xalq ta’limi vazirining birinchi o‘rinbosari Usmon Sharifxo‘jayev mazkur holatga munosabat bildirdi.
Uning so‘zlariga ko‘ra, O‘zbekiston nafaqat Qirg‘izistonda, balki Tojikistonda ham maktab qurgan.
“Maktablar u yerda yashayotgan millatdoshlarimizga ham sharoit qilib berish nuqtayi nazaridan qurildi. Lekin o‘z navbatida, u mamlakatlar ham O‘zbekistonda ijtimoiy obyektlarning bir nechtasini barpo etgan. Xuddi shu Qirg‘iziston hukumati Rishtonda maktabgacha ta’lim muassasasini qurib bergan. Tojikiston Samarqandning Urgut tumanida 1,5 ming o‘rinli maktab barpo qilgan. Siz ham qayergadir mehmonga borsangiz, ular qilgan narsaga javob berasiz. Men bu yerda hech qanaqa yomon narsa ko‘rmayapman. Bu faqat qo‘shnilarning o‘rtasidagi hamkorlik...
O‘zimizda rosa muammolar ko‘p, lekin u yerga boryapmiz deyish emas, bizda ham muammolar hal bo‘lyapti. Maktablarni bundan ham ko‘paytirish masalasi qo‘yilgan”, — deydi vazir o‘rinbosari.
Sharifxo‘jayevning so‘zlariga ko‘ra, 1,2 million qo‘shimcha o‘quvchi o‘rnini yaratish bo‘yicha alohida dastur qabul qilinishi belgilangan.
“Oldingiga nisbatan 3—4 karra ko‘proq maktab qurilayotganini aytsam va buni kimdir ‘yolg‘on’ desa bilmadim, shunchaki statistikani ko‘tarish kerak. Ikki—uch yildan beri davlat tomonidan juda ko‘plab maktablar qurilmoqda, lekin 10—15 yil davomida maktab qurilmaganidan keyin uni yetkazib berishni ham inobatga olish kerak.
Ma’lumot uchun, maktab qurilishi bo‘yicha kelishuvga Qirg‘iziston prezidenti Sadir Japarovning 2021-yil 11—12-mart kunlari O‘zbekistonga tashrifi chog‘ida Shavkat Mirziyoyevning shaxsiy tashabbusi bilan erishilgan.
330 o‘rinli yangi maktab binosi qurilishi 2021-yil iyul oyida boshlangandi. Loyihaning smeta qiymati 3,5 million dollarni tashkil etib, ushbu pullar O‘zbekiston tomonidan ajratilgan.
Eslatib o‘tamiz, O‘zbekiston 2017-yil oktabrida O‘sh shahrida Alisher Navoiy nomidagi 18-sonli yangi zamonaviy maktab-gimnaziya binosini qurishni boshlab, uni 2018-yil 1-sentabrda foydalanishga topshirgan edi.
Izoh (0)