Termiz shahar kambag‘allikni qisqartirish bo‘limi boshlig‘i o‘rinbosari 2 mln so‘m pora bilan ushlandi

Surxondaryo viloyati Termiz shahar kambag‘allikni qisqartirish bo‘limi boshlig‘i o‘rinbosari subsidiya ajratish uchun fuqarodan pul olgan vaqtida ushlandi, deb xabar beradi Bosh prokuratura huzuridagi departament.

Ma’lum qilinishicha, departamentning Surxondaryo viloyati boshqarmasi tomonidan 4-aprel kuni IIB xodimlari bilan hamkorlikda tezkor tadbir o‘tkazilgan. Tadbirda Termiz shahar iqtisodiy taraqqiyot va kambag‘allikni qisqartirish bo‘limi boshlig‘i o‘rinbosari G‘.N. Termiz shahrida subsidiya to‘lanadigan talabgorlarni tanlab olish bo‘yicha komissiyasi mas’ul kotibligidan foydalanib, fuqaro N.ga uy-joy olish maqsadida subsidiya ajratilishi uchun yakuniy xabarnoma berish evaziga 3 million so‘m pora talab qilgani aniqlangan. U fuqarodan muqaddam 1 million so‘mni olib, qolgan 2 million so‘mini olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Kattaqo‘rg‘on shahar kambag‘allikni qisqartirish bo‘limi bosh mutaxassisi 1,2 ming dollar pora bilan ushlangan edi.