Jizzaxda yer maydonini uch kishiga sotmoqchi bo‘lib, jami 185 mln so‘m olgan shaxs ushlandi

Jizzax viloyati Sharof Rashidov tumanida bitta yer maydonini uch nafar shaxsga sotib daromad orttirmoqchi bo‘lgan firibgar ushlandi, deb xabar berdi Tergov departamenti.

Qayd etilishicha, 2020-yil noyabr oyida Sharof Rashidov tumani O‘zbekiston ko‘chasida yashovchi Z.Z. (39 yoshli) o‘zganing mulkini firibgarlik yo‘li bilan qo‘lga kiritish maqsadida o‘ziga tegishli bo‘lgan xonadonning 6 sotixini tanishi, Sharof Rashidov tumani Yangihayot ko‘chasida yashovchi D.D.ga (31 yoshli) sotishini aytgan. D.D.dan jami 86 million so‘m miqdoridagi pullarini qo‘lga kiritib, o‘zining shaxsiy ehtiyojlari uchun ishlatib yuborgan.

Bundan tashqari, Z.Z. o‘zining jinoiy harakatlarini takroran davom ettirib, 2021-yil may oyida xonadonining aynan shu 6 sotix yerini Sharof Rashidov tumani Nodirabegim ko‘chasida yashovchi A.B.ga (33 yoshli) 75 million so‘mga sotishni va’da qilib, ishonchiga kirgan. A.B.dan kelishilgan pulning 24 million so‘mini qo‘lga kiritib, yer maydonini hujjatlashtirib bermagan.

Keyinchalik ushbu yer maydonini Sharof Rashidov ko‘chasida yashovchi S.E.ga (40 yoshli) 75 million so‘mga sotib, S.E.ning nomiga hujjatlashtirib bergani aniqlangan.

Holat yuzasidan Z.Z.ga nisbatan Jinoyat kodeksning 168-moddasi 3-qismi “a,b” bandlari (ko‘p miqdorda; takroran yoki xavfli retsidivist tomonidan firibgarlik) bilan jinoyat ishi qo‘zg‘atilgan. Hozirda tergov harakatlari olib borilmoqda.