«Осиё тараққиёт банки иштирокида автомобиль йўлларини реконструкция қилиш лойиҳаларини амалга ошириш чора-тадбирлари тўғрисида»ги президент қарори қабул қилинди, деб хабар беради Norma.
Қарорга кўра, Осиё тараққиёт банки директорлар кенгаши томонидан «Миллий автомобиль йўлларини ривожлантириш» лойиҳасини амалга ошириш учун 273,8 миллион доллар миқдорида қарз маблағлари 4 йиллик имтиёзли давр билан 24 йил муддатга ажратиш маъқулланган. Шундан:
- 183,8 миллион доллар — 4Р105 Дарбанд—Бойсун—Элбаён автомобиль йўлининг 5—70-километрлари ва 4Р100 Мангузар—Жарқўрғон—Бандихон—Олтинсой—Денов автомобиль йўлининг 128—174 километр қисимларини реконструкция қилиш лойиҳасини амалга оширишга;
- 90 миллион доллар — А380 Ғузор—Бухоро—Нукус—Бейнеу автомобиль йўлининг 228—315-километрлари (87 километр) қисмини реконструкция қилиш лойиҳасини якунлашга.
«Миллий автомобиль йўлларини ривожлантириш» лойиҳасининг амалга оширилишини мувофиқлаштириш ва мониторинг қилиш, ОТБнинг қарз маблағларидан мақсадли фойдаланиш юзасидан масъул ижро этувчи орган Автомобиль йўллари қўмитаси ҳисобланади. Унинг ҳузурида лойиҳани амалга ошириш гуруҳи тузилган. Автомобиль йўллари қўмитаси раиси лойиҳа доирасида ОТБ билан лойиҳа битимини имзолаш ваколатига эга.
ОТБнинг қарз маблағларини сўндириш, шунингдек, фоиз, қарз бўйича комиссия ва бошқа тўловлар билан боғлиқ харажатлар Ўзбекистоннинг республика бюджети маблағлари ҳисобидан амалга оширилади.
Қарор билан қуйидагилар тасдиқланган:
- Бухоро лойиҳаси доирасида ОТБ томонидан ажратиладиган қарзни сўндириш, фоиз ва комиссия тўловларини амалга оширишнинг прогноз жадвали;
- Сурхондарё лойиҳаси бўйича лойиҳа Техник-иқтисодий асосининг асосий техник-иқтисодий кўрсаткичлари;
- Сурхондарё лойиҳаси доирасида ОТБ томонидан ажратиладиган қарзни сўндириш, фоиз ва комиссия тўловларини амалга оширишнинг прогноз жадвали.
Аввалроқ ОТБ Ўзбекистонда касб-ҳунар таълимини яхшилаш учун 93 миллион доллар ажратиши, Осиё инфратузилмавий инвестициялар банки Ўзбекистонда пандемия даврида тадбиркорликни қўллаб-қувватлаш учун 200 миллион доллар ажратгани тўғрисида хабар берилганди.
Изоҳ (0)