Жиззах вилояти Шароф Рашидов туманида битта ер майдонини уч нафар шахсга сотиб даромад орттирмоқчи бўлган фирибгар ушланди, деб хабар берди Тергов департаменти.
Қайд этилишича, 2020 йил ноябрь ойида Шароф Рашидов тумани Ўзбекистон кўчасида яшовчи З.З. (39 ёшли) ўзганинг мулкини фирибгарлик йўли билан қўлга киритиш мақсадида ўзига тегишли бўлган хонадоннинг 6 сотихини таниши, Шароф Рашидов тумани Янгиҳаёт кўчасида яшовчи Д.Д.га (31 ёшли) сотишини айтган. Д.Д.дан жами 86 миллион сўм миқдоридаги пулларини қўлга киритиб, ўзининг шахсий эҳтиёжлари учун ишлатиб юборган.
Бундан ташқари, З.З. ўзининг жиноий ҳаракатларини такроран давом эттириб, 2021 йил май ойида хонадонининг айнан шу 6 сотих ерини Шароф Рашидов тумани Нодирабегим кўчасида яшовчи А.Б.га (33 ёшли) 75 миллион сўмга сотишни ваъда қилиб, ишончига кирган. А.Б.дан келишилган пулнинг 24 миллион сўмини қўлга киритиб, ер майдонини ҳужжатлаштириб бермаган.
Кейинчалик ушбу ер майдонини Шароф Рашидов кўчасида яшовчи С.Э.га (40 ёшли) 75 миллион сўмга сотиб, С.Э.нинг номига ҳужжатлаштириб бергани аниқланган.
Ҳолат юзасидан З.З.га нисбатан Жиноят кодекснинг 168-моддаси 3-қисми «а,б» бандлари (кўп миқдорда; такроран ёки хавфли рецидивист томонидан фирибгарлик) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)