Buxoroga qo‘shni davlatdan noqonuniy tarzda olib kirilgan qiymati jami 3,6 milliard so‘m bo‘lgan avtoehtiyot qismlar saqlovga olindi. Bu haqda “Daryo”ga viloya Bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, viloyat bojxona boshqarmasi “Olot” chegara bojxona postida tovar-moddiy boyliklarni turli yashirin yo‘llar bilan olib kirishga bo‘lgan urinishlarni bartaraf etish maqsadida nazorat tadbiri o‘tkazgan. Tadbirda qo‘shni davlatdan mazkur chegara postga kirib kelgan barcha yuk avtomashinalari belgilangan tartibda ko‘rikdan o‘tkazilgan.
Postda ikkita yuk avtomashinasi haydovchilarining sarosimaga tushishi bojxona xodimlarini shubhalantirgan. Birinchi avtoulov yukxonasida O‘zbekistondagi mas’uliyati cheklangan jamiyatlardan birining nomiga olib kelinayotgan va yuk kuzatuv ko‘rsatilmagan umumiy qiymati 2,1 milliard so‘mlik, jami 746 dona avval foydalanishda bo‘lgan avtoehtiyot qismlar borligi aniqlangan. Keyingi yuk mashinasidan esa hujjatlarda qayd etilgan tovar-moddiy boyliklar orasidan 1,5 milliard so‘mlik, jami 578 dona avval foydalanishda bo‘lgan va yashirib qo‘yilgan avtoehtiyot qismlari topilgan.
Holat yuzasidan bojxona organlari tomonidan surishtiruv ishlari olib borilmoqda.
Izoh (0)