Toshkent investitsiya forumi yakuni bo‘yicha 7,8 mlrd dollarlik aniq shartnomalar va investitsiya bitimlar paketi imzolandi

Toshkent xalqaro investitsiya forumi (TXIF) o‘z ishini yakunladi. Tadbir 2 mingdan ortiq ishtirokchilarni – jahonning 56 mamlakatidan yirik investorlar va yuqori martabali mehmonlarni birlashtirgan biznes dunyosidagi muhim voqeaga aylandi, deb xabar beradi Investitsiyalar va tashqi savdo vazirligi matbuot xizmati.

Ta’kidlanishicha, forum orqali mamlakat hukumati xalqaro ishbilarmonlar hamjamiyatiga investorlar uchun eng qulay va jozibali sharoitlarni yaratish hamda xorijiy hamkorlar va xalqaro tashkilotlar bilan o‘zaro manfaatli munosabatlarni har tomonlama chuqurlashtirishga qaratilgan sa’y-harakatlarning yo‘nalishlarini belgilab bergan.

Forumning panel munozaralari va tadbirlari doirasida mamlakatning turli tarmoqlari va hududlarining investitsiyaviy va iqtisodiy imkoniyatlari ochib berilgan, O‘zbekistonni ijtimoiy-iqtisodiy isloh qilish borasida erishilgan natijalar ko‘rib chiqilgan. Shuningdek, O‘zbekistonni yanada rivojlantirishning ustuvor yo‘nalishlari, mintaqaviy va jahon savdo aloqalarini rivojlantirish istiqbollari, investitsiyalarni jalb qilish mexanizmlari, savdoni liberallashtirish va milliy iqtisodiyotning raqobatbardoshligini oshirish masalalari atroflicha ko‘rib chiqilgan.

“Hukumat, ishbilarmon va ekspert doiralari vakillari koviddan keyingi davrda iqtisodiy faoliyatni jadal rivojlantirishni tiklash va rag‘batlantirish, kambag‘allikni qisqartirish, pul-kredit siyosatini tartibga solish, biznesni qo‘llab-quvvatlash, bank sektori va moliya bozorini rivojlantirish mexanizmlarini muhokama qildilar”, — deyiladi xabarda.

Forum doirasida savdo, iqtisod, investitsiyalar, texnika, madaniyat, sport va yoshlar masalalari bo‘yicha O‘zbekiston va Saudiya Arabistoni o‘rtasidagi hukumatlararo komissiyasining 5-yig‘ilishi, “Sanoat kooperatsiyasi. Yangi imkoniyatlar” O‘zbekiston—Xitoy investitsiyaviy forumi, shuningdek, xalqaro moliya institutlari, xorijiy hukumat moliyaviy tashkilotlari rahbarlari va rivojlanish bo‘yicha hamkorlar ishtirok etgan O‘zbekiston uchun “mamlakat platformasi” bo‘lib o‘tdi. Forum ishtirokchilari ikki tomonlama uchrashuv va muzokaralar chog‘ida ham faol fikr almashgan va hamkorlik istiqbollarini muhokama qilgan.

“TXIF o‘zini mintaqalararo va xalqaro aloqalarni mustahkamlash va rivojlantirish uchun keng ko‘lamli muloqot platformasi sifatida namoyish etib, mamlakatlararo va mintaqalararo investitsiyaviy va tashqi iqtisodiy hamkorlikning kuchli katalizatoriga aylandi. Ushbu forum O‘zbekiston va butun Markaziy Osiyo mintaqasi iqtisodiyotiga xorijiy investitsiyalar va zamonaviy texnologiyalarni jalb qilish, shuningdek, mintaqa tadbirkorlari va xorijiy ishbilarmon doiralar o‘rtasida to‘g‘ridan to‘g‘ri aloqalarni o‘rnatish maqsadida ularni qiziqtirgan yo‘nalishlarni kashf etish uchun doimiy maydonchaga aylanishi kutilmoqda”, — deyiladi xabarda.

Toshkent shahrida 24—26-mart kunlari Toshkent xalqaro investitsiya forumi o‘tkazildi. O‘zbekistonda ilk marta bo‘lib o‘tgan tadbirda xalqaro moliya tashkilotlari, vazirlik va idoralar, dunyoning yetakchi kompaniyalari vakillari, investor va tadbirkorlar qatnashdi. Forumning ochilishida prezident Shavkat Mirziyoyev nutq so‘zlab, tadbirdan ko‘zlangan maqsad respublikada investitsion muhitni yaxshilash ekanini ta’kidladi.