Mashhur ispaniyalik aktrisa Santa-Barbaradagi Xalqaro kinofestivalda nufuzli mukofotga sazovor bo‘ldi. Pedro Almodovar rejissorligidagi “Parallel onalar” filmidagi eng yaxshi ayol roli uchun Akademiya mukofotiga nomzod bo‘lgan Penelopa Krus ham dunyo bo‘ylab yuz berayotgan muhim narsalar haqida gapirish imkoniyatidan foydalandi.
Aktrisa statuetkani olar ekan, barchaning e’tiborini butun dunyodagi va xususan, Ukrainadagi ayollarning dahshatli ahvoliga qaratishini zarur deb hisobladi.
“Men farzandini yo‘qotishdan qo‘rqqan ayollarni juda yaxshi tushunaman. Dunyoda qanchalab ayollar katta sinov hamda dahshatlarga duch kelmoqda. Bugun mening yuragim va xayolim Ukraina ayollarida, barcha bolalar va erkaklarida hamda bu dahshatli vaziyatdan aziyat chekayotganlarda”, – dedi aktrisa.
2022-yil Santa Barbara Xalqaro kinofestivali Ukrainaga yordam berish uchun Direct Relief bilan hamkorlik qilmoqda. Rossiyaning Ukrainaga qarshi harbiy tajovuzidan jabrlanganlarni qo‘llab-quvvatlash uchun mablag‘ yig‘ish ishlari davom etyapti.
Aktrisaning o‘zi ham Instagram’da Ukrainadagi urushdan jabr ko‘rganlarga yordam berish mavzusida muhim postlarni e’lon qildi.
https://www.instagram.com/p/Ca6KQX5AL6j/
Eslatib o‘tamiz, avvalroq Gollivud yulduzi Keyt Blashett butun dunyoni ukrainalik muhojir va qochqinlarga yordam berishga chaqirib, video murojaat yo‘lladi. Shuningdek, Gollivud yulduzlari Rayan Reynolds va Bleyk Layvli ukrainalik qochoqlar uchun million dollar xayriya qildi. Shuningdek, jahonga mashhur aktrisa Anjelina Joli ham Ukrainadagi vaziyatga munosabat bildirib, tinch aholiga yordam berishini ma’lum qilgandi. Aktrisa uzoq vaqtdan beri BMTning yaxshi niyat elchisi sifatida butun dunyo bo‘ylab qochqinlarni qo‘llab-quvvatlab keladi.
Mavzuga doir: Devid va Viktoriya Bekhem ukrainalik bolalarga yordam berish uchun xayriya aksiyasini boshladi
Izoh (0)