Rossiya prezidenti Vladimir Putin sanksiyalar sharoitida iqtisodiyotni qo‘llab-quvvatlash maqsadida inqirozga qarshi soliq chora-tadbirlari to‘g‘risidagi qonunni imzoladi.
Qonunda quyidagi chora-tadbirlarni amalga oshirish ko‘zda tutilgan:
- 2021–2023-yillarda Rossiya banklaridan olingan foiz daromadlarini jismoniy shaxslarning daromad solig‘idan ozod qilish;
- bankrotlik va tugatilish jarayonidagi barcha soliq to‘lovchilarga nisbatan QQS o‘rnini to‘ldirish tartibini joriy etish;
- transport solig‘idagi ko‘tarilgan koeffitsiyentni faqat 10 million rubldan qimmat avtomobillarga nisbatan tatbiq qilish;
- 2022–2024-yillarda IT-kompaniyalar daromadiga nisbatan nol soliq stavkasi belgilanmoqda.
8-mart kuni Putin sanksiyalar sharoitida inqirozga qarshi chora-tadbirlarni amalga oshirishga doir boshqa bir qonunni imzolagandi. Hujjat bilan hukumatga qo‘shimcha sug‘urta pensiyalarini indeksatsiya qilish huquqi taqdim qilingan.
17-martda Rossiya bosh vaziri Mixail Mishustin Vazirlar mahkamasi tomonidan fuqarolar va biznesni qo‘llab-quvvatlash, ijtimoiy to‘lovlarni, shuningdek aholi kun kechirishi uchun zarur bo‘lgan eng oz miqdor hamda mehnatga haq to‘lashning eng kam miqdorini oshirish yuzasidan ishlar amalga oshirilayotganini bildirgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)