Rossiya Xavfsizlik kengashi raisi o‘rinbosari Dmitriy Medvedev Rossiya sanksiyalar qo‘llagan davlatlar “bozor iqtisodiyotining umumiy asoslarini rad etgani uchun” shunga mos javob olishini ma’lum qildi. U Markaziy bank va moliyaviy tashkilotlar aktivlarining muzlatilishini “qoidasiz urush” deb atab, buning oqibatlari jahon iqtisodiy tartibining yo‘q qilinishiga olib kelishini ta’kidlagan, deb xabar beradi “Kommersant”.
“Bu sayyoramizda, avvalo Yevropa, AQSH, yurtimizda, so‘ng XVIII asr oxirlari XIX asr boshlarida Osiyo davlatlarida shakllangan umumiy iqtisodiy qadriyatlarga hujumdir. Ya’ni bu bozor iqtisodiyotining umumiy asoslarini rad etishdir. Bu yerda nima deyish mumkin: ularga qadrli bo‘lmasa, mayli, buni amalga oshiraversin, biroq ma’lum sabablarga ko‘ra, tabiiyki, ular Rossiya tomonidan shunga mos javobni oladi”, — deydi Medvedev.
Xavfsizlik kengashi raisi o‘rinbosarining hisoblashicha, Rossiya “hech kimdan umid qilmaydi” va hukumat aviasozlik, avtomobilsozlik, mikroelektronika, IT-texnologiya bilan bog‘liq masalalarni o‘zi hal etishi kerak.
Dmitriy Medvedev 1998-yilgi defolt qaytariladimi, degan savolga “o‘sha vaqtda mamlakat kamroq himoyalangan edi”, deya javob qaytargan. Uning fikricha, “bitta suvga ikki marta tushib ketib bo‘lmaydi”.
Rossiya 24-fevralda Ukraina hududida maxsus harbiy operatsiyalarni boshlaganidan keyin YI, AQSH, Buyuk Britaniya, Kanada, Yaponiya, Janubiy Koreya, Avstraliya va boshqa davlatlar rossiyalik biznesmenlar, top-menejerlar, siyosatchilar va amaldorlarga nisbatan bir qator taqiq hamda cheklov paketlarini joriy etgan.
Izoh (0)