Тош кўтариш, арқон тортиш, варраклар сайли — Фарғонадаги Наврўздан фоторепортаж

Фарғона вилоятининг барча туман ва шаҳарларида Наврўзи олам — шарқона янги йил муносабати билан халқ сайиллари, томоша ва концертлар бўлиб ўтмоқда. «Дарё» фотомухбири Элёр Мамажонов байрам тадбирларининг эътиборга молик лаҳзаларини тасвирга олди.

Фарғона шаҳридаги Ислом Каримов номидаги театр-концерт саройи хиёбонида вилоятнинг Наврўз тантаналари ўтказилди.

Хиёбон эрта тонгданоқ минглаб фарғоналиклар билан гавжум бўлди. Байрам иштирокчилари карнай-сурнай садолари остида кутиб олинди.

Халқ сайиллари спортчи ёшларнинг кўргазмали чиқишлари, дор ва миллий ўйинлар мусобақалари билан бошланди. Кураш, тош кўтариш, арқон тортиш, варраклар сайли, халқ амалий санъати — фолклор намуналари, бир-биридан мазали миллий таомлар танловлари ўтказилди.

Сайилларда вилоятдаги қирғиз, тожик, рус ҳамда корейс миллий маданий марказлари фаоллари ҳам ўз одат ва анъаналари акс этган чиқишлари билан иштирок этди.

Байрам тадбирида вилоятдаги туман ва шаҳарлар томонидан махсус павильонлар ташкил этилиб, ўша ҳудудга хос урф-одатлар кўрсатиб берилди, миллий таомлар ва ҳунармандчилик маҳсулотлари кўргазмалари намойиш этилди.

Хиёбон бўйлаб ўрнатилган дошқозонларда Наврўзнинг шоҳ таоми — сумалак қайнади, 23 та қозонда ош дамланиб, байрам иштирокчиларига тарқатилди.

Фолклор гуруҳлари, халқ ансамбллари, бадиий ҳаваскорлик жамоалари томонидан халқона куй-қўшиқлар, ўлан-лапарлар ижро этилди.

Абдулҳай Каримов, Отабек Муҳаммадзоҳид, Абдужалил Қўқонов, Зоҳиршоҳ Жўраев, Ёрқинхўжа Умаров, Хумора Шокирова таниқли санъаткорлар иштирокидаги концерт дастури фарғоналикларга байрамона кайфият улашди.

Байрам тадбирлари доирасида хайрия акциялари ўтказилиб, кам таъминланган, эҳтиёжманд оилалар ҳолидан хабар олинди.

Фарғонадаги боғ ва хиёбонларда байрам тантаналари ва халқ сайиллари давом этмоқда.