AQSH prezidenti Jo Baydenning administratsiyasi Ukrainadagi urush fonida 400 nafar rossiyalikka qarshi yangi sanksiyalarni tayyorlamoqda. Ularning 328 nafari Rossiya Davlat dumasi deputatlari va rus elitasi vakillaridir, deb xabar beradi The Wall Street Journal.
Nashr ma’lumotlariga ko‘ra, sanksiyalar Yevropa Ittifoqi va “Katta yettilik” (G7) a’zolari bilan kelishilgan. Bayden ushbu yangi cheklovlarni 24-mart kuni Yevropaga amalga oshiradigan tashrifi davomida e’lon qilishi kutilmoqda. Oq uyning ma’lum qilishicha, shu kuni Bryusselda NATOning navbatdan tashqari sammiti bo‘lib o‘tadi.
Reuters’ning yozishicha, G‘arb davlatlari, shuningdek, Rossiyaning “Katta yigirmalik” — G20’ga a’zoligini muhokama qiladi. Oldinroq Polsha Amerika hukumatiga Rossiyani guruhdan chiqarib yuborish taklifini bergandi.
AQSH prezidentining milliy xavfsizlik bo‘yicha maslahatchisi Jeyk Sallivan Vashington va uning ittifoqchilari ushbu masalani muhokama qilayotganini tasdiqlagan.
Avvalroq AQSh, Yevropa Ittifoqi va boshqa davlatlar Rossiyaning Donetsk va Lugansk mustaqilligini tan olib, Ukrainaga bostirib kirganidan so‘ng unga qarshi bir necha bor sanksiyalar joriy qilgan. Cheklovlar bank sektori, aviatsiya, qator yuqori martabali siyosatchilar va amaldorlar, ishbilarmonlar, shuningdek, shaxsan Rossiya prezidenti Vladimir Putin va uning atrofidagilarga taalluqli bo‘lgan.
Izoh (0)