AQSH prezidenti Jo Bayden 23-mart, chorshanba kuni Yevropaga jo‘nab ketadi, u yerda NATO va G7 yetakchilarining sammitida ishtirok etadi hamda Yevropa Ittifoqi yetakchilari oldida nutq so‘zlaydi. Baydenning safaridan bosh maqsad G‘arbning Ukrainadagi vaziyatga keyingi munosabatini muvofiqlashtirishdir.
“Prezident Bayden biz ittifoqchilar va hamkorlar bilan o‘rnatgan beqiyos birlikka tayanib, keyingi qadamlar bo‘yicha maslahatlashish uchun Yevropaga boradi”, — dedi AQSH prezidentining milliy xavfsizlik bo‘yicha maslahatchisi Jeyk Sallivan Oq uydagi brifingda.
Bayden avvaliga Bryusselga tashrif buyuradi, u yerda 24-mart kuni NATO yetakchilarining sammiti, 24—25-mart kunlari Yevropa kengashi yig‘ilishi bo‘lib o‘tadi, unda Bayden nutq so‘zlashi kutilmoqda. Shuningdek, 24-mart kuni G7 yetakchilarining uchrashuvi bo‘lib o‘tadi.
“U NATO yetakchilarining favqulodda sammitida ishtirok etadi, ‘Katta yettilik’ yetakchilari yig‘ilishida qatnashadi va Yevropa Kengashi yig‘ilishida Yevropa Ittifoqiga a’zo 27 davlat yetakchilari oldida chiqish qiladi”, — dedi Sallivan.
Xususan, ushbu tadbirlarda Ukrainaga harbiy yordam ko‘rsatish, Rossiyaga esa sanksiyalar yordamida ham yangi choralar ishlab chiqish, ham mavjud choralarni kuchaytirish orqali bosim o‘tkazish kabi mavzular muhokama qilinadi.
“U Yevropaning energiya xavfsizligini mustahkamlash va Rossiya gaziga qaramligini kamaytirish bo‘yicha qo‘shma harakatlarni e’lon qiladi”, — deya qo‘shimcha qildi Sallivan.
Bundan tashqari, Sallivanning so‘zlariga ko‘ra, Bayden hamkorlar bilan birgalikda Rossiyaga qarshi yangi sanksiyalarni e’lon qilishni rejalashtirmoqda. U AQSH bu ishni sheriklaridan aynan qaysi biri bilan amalga oshirishiga aniqlik kiritmadi.
Bryusseldan keyin Bayden Polshaga boradi va u yerda AQSH harbiy xizmatchilari, shuningdek, gumanitar ekspertlar hamda mamlakat prezidenti Anjey Duda bilan ham uchrashadi.
Izoh (0)