Tesla rahbari Ilon Mask Germaniyada kompaniyaning yangi zavodini rasman ochdi. Elektromobil ishlab chiqarish korxonasi uchun 5 milliard yevrodan ortiq mablag‘ sarflangan, deb xabar beradi “Interfaks”.
Ochilish marosimida Mask yangi zavod ham elektromobil, ham akkumulyatorlar ishlab chiqarish uchun asos bo‘lishini ma’lum qilgan. Berlin yaqinidagi Gryunxayde shahrida joylashgan “Gigafabrika” hozirgi kunga qadar AQSH va Xitoydan avtomobil yetkazib berilgan Yevropa bozori uchun elektromobillarni ishlab chiqaradi.
Zavod yiliga 500 ming donagacha elektromobil ishlab chiqaradi va 12 ming ish o‘rni yaratadi. Birinchi bosqichda bu yerda ixcham Model Y krossoverlari ishlab chiqariladi. 22-mart kuni o‘tkazilgan marosimda Mask yangi zavoddan chiqqan 30 mashinani o‘z mijozlariga topshirgan.
“Biz ishlab chiqarayotgan har bir elektr transport vositasi barqaror energiya kelajagi sari navbatdagi qadam bo‘ladi”, — deydi Mask ochilish marosimida.
Germaniya kansleri Olaf Shols Tesla zavodining qurilishini ma’qullab, bu mintaqa iqtisodiyotini qo‘llab-quvvatlashini bildirgan. Biroq ekspertlarning ta’kidlashicha, Ukraina atrofida yuzaga kelgan vaziyat ehtiyot qismlar yetishmovchiligi muammosini kuchaytirib, Tesla’ning yangi korxonasi imkoniyatlariga salbiy ta’sir ko‘rsatadi.
“Tesla o‘zini ta’minotdagi uzilishlar muammosidan butunlay himoyalay qila olmaydi”, — deydi Center of Automotive Management direktori Shtefan Bratsel.
Germaniyaning Center Automotive Research (CAR) ekspertlarining taxminicha, 2022-yilda Germaniyadagi Tesla korxonasi kamida 100 ming avtomobil ishlab chiqaradi, 2023-yilda ishlab chiqarish keskin o‘sadi.
22-mart kuni savdolarda Tesla aksiyalari 3,4 foizga qimmatlashgan. So‘nggi bir yil ichida ularning qiymati 44 foizga o‘sdi.
Eslatib o‘tamiz, 2021-yilning oktabrida Tesla kompaniyasi Yevropadagi birinchi “Gigafabrika”si — Gryunxaydda joylashgan zavodning ochilishini tantanali tarzda nishonlagandi. Tadbirda 9 ming kishi ishtirok etgan bo‘lib, dijeylar taklif etilgan va bolalar hamda kattalar uchun turli tadbirlar uyushtirilgan. Kompaniya rahbari Ilon Mask nemis tilida tabrik nutqini so‘zlagan va kelajakda korxona hududida vokzal hamda pivo zavodi qurilishiga va’da bergan.
Yevropadagi “Gigafabrika”ni qurish ishlari 2019-yilda boshlangan va qator muammolarga duch kelgan. Qurilish maydonida ishlar turli sabablarga ko‘ra bir necha bor to‘xtab qolgan — masalan, hududda topilgan Ikkinchi jahon urushiga oid jangovar o‘q-dorilar, keyinroq — kaltakesak va ilonlar populyatsiyasiga zarar yetkazilishi xavfi sabab. 2021-yilning mayida radikal faollar korxonadagi yuqori voltli kabellarni yoqib yuborgan.
Izoh (0)