Germaniya yil oxirigacha Rossiya neftidan deyarli to‘liq mustaqil bo‘lishni rejalashtirmoqda

Germaniya kuzga borib Rossiya ko‘miridan, 2022-yil oxirida esa Rossiya neftidan mustaqil bo‘lishni maqsad qilgan. Bu haqda Germaniya Federativ Respublikasi iqtisodiyot vaziri Robert Xabek ma’lum qilgan, deb yozmoqda “Kommersant”.

Frankfurter Allgemeine Zeitung gazetasiga bergan intervyusida Xabek Germaniya hukumati Rossiyadan import qilinadigan energiya resurslaridan to‘liq voz kechishni rejalashtirayotganini bildirgan. Vazir Putinning tajovuzkor urushi oqibatida barchaning zudlik bilan embargo e’lon qilishini to‘g‘ri tushunishi, shuningdek, Moskvaning ushbu harakatini butun mamlakat mas’uliyatiga olishi haqida gapirdi. GFR iqtisodiyot vaziri qabul qilinayotgan qarorlar oqibatini ham hisobga olish kerakligini ta’kidladi.

“Gap shaxsiy manfaatlarni qurbon qilish emas, balki iqtisodiy va ijtimoiy tomondan jiddiy qisqartirishlar haqida: kelasi qishda import zudlik bilan taqiqlash oldidan iqtisodiyotning pasayishi, inflyatsiya oshishi, minglab ishsiz qolgan odamlarning halovati yo‘qolishi, isitish va elektr ta’minotida katta muammolar bo‘lishini inobatga olish lozim. Sanksiyalarda biz yakunda bunday muammolarga dosh berishimiz ko‘zda tutilishi kerak... Har kuni kecha-yu kunduz ushbu masalalarni hal etish, Rossiya nefti, gazi va ko‘miriga qaramlikni kamaytirish ustida ishlayapmiz”,— degan Robert Xabek.

Vladimir Putin 24-fevralda Ukrainada maxsus harbiy operatsiyalar boshlanganini e’lon qilgan. G‘arb davlatlari ushbu urushga javoban Rossiyaga qarshi keskin sanksiyalar joriy etdi. Jumladan, 8-mart kuni AQSh Rossiya nefti va neft mahsulotlari xaridiga embargo e’lon qildi. Buyuk Britaniya ham shunday qarorga kelgan va 2022-yil oxirida Rossiya neft-gazidan to‘liq voz kechmoqchi. Reuters agentligi Yevropa ittifoqining Rossiya gazi va neftidan bosqichma-bosqich voz kechishni rejalashtirayotgani haqida xabar berdi. Germaniya kansleri Olaf Shols Rossiya nefti va gazining Yevropada energiya xavfsizligini ta’minlash maqsadida sanksiyalar qo‘llanilmaganini bildirgan. Mart boshida Germaniya Rossiyani aylanib o‘tgan holda gaz sotib olishni boshlab yuborgan.