Moskvada Rossiya prezidenti Vladimir Putin hamda Belarus davlat rahbari Aleksandr Lukashenko o‘rtasida muzokaralar o‘tkazildi. Ikki mamlakat rahbarlarining uchrashuvi 5 soat davom etdi. Muzokaralarning eng asosiy mavzularidan biri Ukrainadagi vaziyat muhokamasi bo‘ldi, deb yozmoqda “Kommersant”.

Uchrashuvda Aleksandr Lukashenko Belarusga go‘yoki Ukraina tomonidan hujum tayyorlangani, shu sababli ham ularning pozitsiyalariga zarbalar berilgani haqida gapirdi. Lukashenko bu boradagi tegishli dalillarni Rossiya prezidentiga xaritadan ko‘rsatishni va’da qildi.

“Ha biz siz bilan vertolyotda o‘tirganimizda doimiy ravishda hisobot berib borishdi. Hozir men sizga Belarusga aynan qaysi tomondan hujum tayyorlanganini ko‘rsataman. Operatsiyadan olti soat avval pozitsiyalarga xavfsizlik ogohlantirish zarbalarini berdik, hozir o‘zim bilan olib kelgan xaritadan ko‘rsataman, ular bizning ya’ni Belarus va Rossiyaning o‘quv mashg‘ulotlarida bo‘lgan qo‘shiniga hujum qilgan. Urushni biz yuzaga keltirmadik, vijdonimiz toza. Yaxshiyam uni boshlab oldik”,— deya Lukashenko so‘zlaridan iqtibos keltirgan Kreml rasmiy sayti.

Shuningdek, Lukashenko yarim yildan keyin odamlarning iqtisodiyot tomonidan nimalar bo‘lganini yodidan chiqarishini, ushbu qiyinchiliklarning vaqtinchalik ekanini qayd etgan.

Vladimir Putin bunga javoban hozirda iqtisodiyotga kuchli zarba berilayotgani, ammo so‘nggi yillarda g‘arb Rossiya va Belarusga qarshi joriy etgan taqiqlardan keyin ushbu ikki mamlakat yangi va eski texnologik vakolatlarni qayta tiklaganini bildirgan hamda belaruslik hamkasbiga bu borada fikr almashishni taklif etgan. Uchrashuvning qolgan qismi yopiq eshiklar ortida o‘tgan.