11-mart kuni Jo Bayden kamida ikki marta AQSh NATOga a’zo mamlakatlar hududidagi “har bir dyuymni” Rossiya tajovuzidan himoya qilishga tayyor ekanini ma’lum qildi.

Bayden Oq uyda Rossiyaga qarshi yangi cheklovlarni e’lon qilish davomida AQSh Ukrainaga qo‘shimcha yordam ko‘rsatish va NATO ittifoqchilarini qo‘llab-quvvatlash niyatida ekanini bildirgan.

“Biz Yevropadagi ittifoqchilarimiz bilan yelkama-yelka turishni davom etamiz va xatosiz signalni yuboramiz: NATO hududidagi har bir dyuymni to‘liq kuch bilan himoya qilamiz — birlashgan va harakatga tayyor NATOni. Biz Ukrainada Rossiyaga qarshi urushmaymiz. NATO va Rossiya o‘rtasidagi to‘g‘ridan to‘g‘ri qarama-qarshilik — bu Uchinchi jahon urushi, biz uni oldini olishga harakat qilishimiz kerak. Biroq shuni bilamizki, Putin hech qachon Ukrainaga qarshi urushda g‘alaba qozonmaydi”, — deydi Amerika yetakchisi.

Bloomberg’ning yozishicha, Bayden Filadelfiyada AQSh Demokratlar partiyasi vakillari qarshisi qilgan chiqishi davomida ham shu kabi bayonotni bergan. U “har bir dyuymni” himoya qilishga tayyorligini aytgan. Shuningdek, prezident Bayden Rossiya NATO davlatlariga hujum uyushtirsa, AQSh javob qaytarishini ma’lum qilgan. “Albatta, biz javob qaytarsak bu Uchinchi jahon urushi bo‘ladi, ammo bizning muqaddas burchimiz bor”, — deydi AQSh prezidenti.

Baydenning so‘zlariga ko‘ra, AQSh Rossiya chegarasi yaqinidagi NATOga a’zo davlatlar — Latviya, Litva, Estoniya, Ruminiyaga 12 mingdan ortiq amerikalik harbiy xizmatchini yuboradi.

Demokratlar bilan suhbatda Jo Bayden Ukraina uzra parvozlarni taqiqlovchi hudud tashkil etish urushni anglatishini aytgan. “Biz Ukrainada Uchinchi jahon urushini olib bormaymiz”, deya qo‘shimcha qiladi u.