Rasmiy tashrif bilan Misrda bo‘lib turgan Tojikiston prezidenti Emomali Rahmonga Qohira universitetining “Faxriy doktori” unvoni berildi. Bu haqda davlat rahbarining matbuot xizmatiga tayanib, Asia Plus xabar berdi.
Qayd etilishicha, Emomali Rahmon ushbu unvonni ikki mamlakat o‘rtasidagi do‘stlik va hamkorlik munosabatlarini mustahkamlashga, ilmiy aloqalar, gumanitar va madaniy aloqalarni rivojlantirishga qo‘shgan hissasi, shuningdek, suv va iqlim sohasidagi global tashabbuslari uchun olgan.
Taqdirlash marosimi 10-mart kuni Tojikiston prezidentining Qohira universitetiga tashrifi davomida bo‘lib o‘tgan.
O‘z chiqishi davomida Emomali Rahmon “Tojikiston tinchlik va osoyishtalikni saqlash, barcha nizolarni tinch yo‘l bilan hal etish tarafdori sifatida dunyoda o‘zining noyob tajribasi bilan mashhur”ligini ta’kidlagan.
Emomali Rahmon dunyodagi siyosiy vaziyatga to‘xtalar ekan, Tojikiston va Misr o‘rtasida terrorizm, ekstremizm va transmilliy uyushgan jinoyatchilikka qarshi kurashda hamkorlikni kengaytirish, axborot va tajriba almashish juda muhim ekanini qayd etgan.
“Birlashgan iroda bilan mamlakatlarimiz va islom olamini terrorizm va radikalizm tahdididan asrashimiz, muqaddas islom dinini tahqirlashning oldini olishimiz kerak”, — deydi Tojikiston prezidenti.
Ma’lumot uchun, Qohira universiteti Misrning eng muhim ta’lim va tadqiqot dargohlaridan hisoblanadi va u 1908-yilining 21-dekabrida tashkil etilgan. U qadimiyligi bo‘yicha Misrda ikkinchi, arab olamida esa Al-Azxar va Al-Karauin universitetlaridan keyin uchinchi o‘rinda turadi. Universitet yuqori malakali mutaxassislar va olimlarni tayyorlashda muhim o‘ringa ega. Har yili ta’lim muassasasini 155 ming nafardan ortiq talaba bitiradi.
Izoh (0)