Turkmanistonda 12-mart kuni soat 07:00 muddatidan oldingi prezidentlik saylovlarini o‘tkazish uchun 2577 ta ovoz berish uchastkalari ochildi, deb xabar beradi Tengrinews. Ovoz berish jarayonlari soat 19:00 ga qadar davom etadi.
Turkmanistonning xorijdagi diplomatik va konsullik muassasalarida ochilgan 41 ta saylov uchastkasida ham ovoz berish jarayonlari amalga oshirilyapti. U yerda ovoz berish o‘sha davlatning mahalliy vaqti bilan soat 19:00 ga qadar davom etadi.
Turkmaniston prezidentligiga to‘qqiz kishi o‘z nomzodini qo‘ygan: amaldagi prezidentning o‘g‘li, bosh vazir o‘rinbosari Serdar Berdimuhamedov, Mari viloyati hokimining o‘rinbosari Agjan Bakmiradov, “Avaza” sanatoriysi bosh shifokori Berdimammet Gurbanov, tuman sanitariya-epidemologiya xizmati boshlig‘i Maksatmirat Ovezgeldiyev, “Qayta tiklanuvchi energiya manbalari” ilmiy-tadqiqot markazi direktori Kakageldi Sariyev, moliya-iqtisod maktabi direktori Perxat Beganjov, “Ishonchli qurilish” xo‘jalik jamiyati direktori Babamirat Meredov, Turkmaniston davlat jismoniy tarbiya va sport institutining ilmiy ishlar bo‘yicha prorektori Xidir Nunnayev va Demokratlar partiyasi tuman qo‘mitasi raisi Maksat Odeshov.
Turkmaniston qonunchiligida saylovchilarning ishtirok etish chegarasi belgilanmagan, shuning uchun saylovchilarning har qanday faolligida ham saylov o‘tgan deb topiladi.
Turkmaniston Saylov kodeksiga ko‘ra, Markaziy saylov komissiyasi saylovdan keyin yettinchi kundan kechiktirmay ovozlarni umumlashtiradi, bayonnoma tuzadi va natijalarini e’lon qiladi. Ovoz berishda ishtirok etgan saylovchilarning yarmidan ko‘pining ovozini olgan nomzod prezident sifatida e’lon qilinadi.
Turkmaniston prezidenti etib mamlakat hududida tug‘ilgan, 40 yoshdan kichik bo‘lmagan, davlat tilini biladigan, 15 yil davomida Turkmanistonda muqim yashagan va ishlagan nomzod saylanishi mumkin. Turkmaniston prezidenti bevosita xalq tomonidan yetti yil muddatga saylanadi va qasamyod qabul qilgan vaqtidan lavozimga kirishadi. Yangi prezidentning inauguratsiyasi 19-martda bo‘lib o‘tadi.
Eslatib o‘tamiz, 11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov rahbarlikni yoshlarga topshirish va faoliyatini Xalq maslahati raisi sifatida davom ettirish niyatini ma’lum qildi.
15-fevral kuni Berdimuhamedovning o‘g‘li, iqtisodiyot bo‘yicha bosh vazir o‘rinbosari Serdar Berdimuhamedov bo‘lajak saylovlarda mamlakat prezidentligiga birinchi nomzod sifatida ko‘rsatildi. Keyinroq turkman muxolifatining xorijdagi vakillari ham prezidentlik saylovlarida qatnashish istagini bildirgandi. Ular onlayn ovoz berish usulini taklif qilgan.
Izoh (0)