Ижтимоий тармоқларда эндиликда болалар 2 ёшдан боғчага қабул қилиниши ҳақида хабарлар тарқалганди. Ушбу хабарлар юзасидан Мактабгача таълим вазирлиги муносабат билдирди.
Қайд этилишича, Ўзбекистон Республикаси президенти Шавкат Мирзиёев томонидан имзоланган «Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида»ги фармонининг 17 «б» бандига кўра, тўлиқ қувват билан ишламаётган давлат мактабгача таълим ташкилотларига 2 ёшдан 3 ёшгача бўлган болаларни пуллик хизмат кўрсатиш шаклида қабул қилишга рухсат берилади.
«Мактабгача таълим ташкилоти томонидан кўрсатилиши режалаштирилаётган қўшимча хизматлар турлари ҳамда улар учун белгиланадиган тўловлар миқдори мактабгача таълим ташкилотининг кузатув кенгаши йиғилишида муҳокама қилинади.
Мактабгача таълим ташкилотлари томонидан кўрсатиладиган қўшимча хизматларнинг нархлар прейскуранти тегишли мактабгача таълим туман (шаҳар) бўлинмаси билан келишилган ҳолда мактабгача таълим ташкилотининг директори томонидан тасдиқланади», – дейилади вазирлик хабарида.
Аввалроқ Тошкентда ўтказилган матбуот анжуманида Мактабгача таълим вазирлиги бўлим бошлиғи Баҳром Хидирбоев ҳозирги вақтда асосий вазифалардан бири боғчаларга 3 ёшдан 7 ёшгача бўлган болаларни қамраб олишдан иборат эканини маълум қилганди.
«Бу вазифани тўлиқ амалга оширгач, яъни 80 фоизга етказгандан кейин (ҳозир 71 фоиз) 2 ёшлилар масаласи ҳам кўриб чиқилади. Хорижлик экспертлар таҳлилларига кўра, бола 3 ёшгача онаси билан бўлиши унинг руҳий ривожланишига жуда яхши таъсир қилади. Ривожланган давлатларда ҳам болалар 3 ёшдан боғчага қабул қилинади», — деганди у.
Изоҳ (0)