7—8-mart kunlari Ukrainadan Polshaning Katovitse aeroporti orqali 428 nafar O‘zbekiston fuqarosi, shu jumladan, 69 nafar ayol, 48 nafar voyaga yetmagan shaxs va 11 nafar chaqaloq olib kelindi. Bu haqda Tashqi ishlar vazirligi rasmiy vakili xabar berdi.
Ma’lum qilinishicha, 28-fevraldan 8-martga qadar 21 ta aviareys tashkillashtirilgan hamda urush bo‘layotgan joylardan 4 787 nafar O‘zbekiston fuqarosi vataniga qaytarilgan. 8-mart kuni yana ikkita reys amalga oshirilishi rejalashtirilgan.
Shu bilan birga, Moldova hududida bo‘lib turgan O‘zbekiston fuqarolarini olib chiqish masalasini ishlab chiqish boshlandi.
3-mart kuni Ukrainaning Moldova bilan chegaradosh joylarida yashovchi 200 ga yaqin o‘zbekistonlik boshpana izlab, Moldova hududiga o‘tgani to‘g‘risida xabar berilgandi. O‘zbekistonning Ukrainadagi elchixonasi fuqarolarga Moldovaga borish osonroq bo‘lsa, ushbu variantni ko‘rib chiqishlari lozimligini bildirgan. Ushbu fuqarolarning keyinchalik vataniga evakuatsiya qilinishini tashkil etish uchun elchixona tomonidan ularning ro‘yxati va ma’lumotlar bazasi shakllantirilmoqda.
Izoh (0)