Ukrainadan Polshaning Katovitse aeroporti orqali 5—6-mart kunlari 440 nafar O‘zbekiston fuqarosi, shu jumladan, 88 nafar ayollar, 59 nafar voyaga yetmagan shaxs va 20 ta chaqaloq olib kelindi. Bu haqda Tashqi ishlar vazirligi rasmiy vakili xabar qildi.
Qayd etilishicha, 28-fevraldan 5-martga qadar 16 ta aviareys tashkillashtirilgan. Urush bo‘layotgan joylardan 3 ming 685 nafar o‘zbekistonlik qaytarilgan. 6-martga qator reyslar amalga oshirilishi rejalashtirilgan.
Polsha hududida mamlakatning 850 dan ortiq fuqarosi qolmoqda. Ulardan 50 nafari Polsha davlat chegarasidagi to‘planish nuqtasiga, qariyb 800 nafari esa Katovitse aeroportiga joylashtirilgan.
“O‘zbekistonning Ukrainadagi elchixonasi vatandoshlar bilan doimiy muloqot olib bormoqda. Diplomatlar Ukrainaning turli nuqtalarida, shu jumladan, jang harakatlari davom etayotgan hududlarda bo‘lib, fuqarolarimizni evakuatsiya qilish ishlarini amalga oshirmoqdalar”, — deyiladi xabarda.
Ma’lumot uchun, Polsha hududida evakuatsiya qilinishini kutayotgan O‘zbekiston fuqarolari 15-martgacha ushbu mamlakatni tark etishi zarur. Polshadan aholini evakuatsiya qilish bo‘yicha maxsus komissiya boshidanoq evakuatsiya uchun muhlatni shu muddatgacha belgilagan. Keyin esa chet el fuqarolari uchun vizasiz tartib tugaydi va jarimalar qo‘llanishi boshlanadi.
O‘zbekistonning Ukrainadagi elchixonasi fuqarolarga Moldovaga borish osonroq bo‘lsa, ushbu variantni ko‘rib chiqishlari lozimligini bildirgandi. Ushbu fuqarolarning keyinchalik vataniga evakuatsiya qilinishini tashkil etish uchun elchixona tomonidan ularning ro‘yxati va ma’lumotlar bazasi shakllantirilmoqda.
Ukraina fuqaroligini olgan yoki O‘zbekistonliklar bilan oila qurgan boshqa davlat fuqarolari ushbu davlatdan pullik asosda evakuatsiya qilinishi mumkin.
Izoh (0)