Украинадан Польшанинг Катовице аэропорти орқали 5—6 март кунлари 440 нафар Ўзбекистон фуқароси, шу жумладан, 88 нафар аёллар, 59 нафар вояга етмаган шахс ва 20 та чақалоқ олиб келинди. Бу ҳақда Ташқи ишлар вазирлиги расмий вакили хабар қилди.
Қайд этилишича, 28 февралдан 5 мартга қадар 16 та авиарейс ташкиллаштирилган. Уруш бўлаётган жойлардан 3 минг 685 нафар ўзбекистонлик қайтарилган. 6 мартга қатор рейслар амалга оширилиши режалаштирилган.
Польша ҳудудида мамлакатнинг 850 дан ортиқ фуқароси қолмоқда. Улардан 50 нафари Польша давлат чегарасидаги тўпланиш нуқтасига, қарийб 800 нафари эса Катовице аэропортига жойлаштирилган.
«Ўзбекистоннинг Украинадаги элчихонаси ватандошлар билан доимий мулоқот олиб бормоқда. Дипломатлар Украинанинг турли нуқталарида, шу жумладан, жанг ҳаракатлари давом этаётган ҳудудларда бўлиб, фуқароларимизни эвакуация қилиш ишларини амалга оширмоқдалар», — дейилади хабарда.
Маълумот учун, Польша ҳудудида эвакуация қилинишини кутаётган Ўзбекистон фуқаролари 15 мартгача ушбу мамлакатни тарк этиши зарур. Польшадан аҳолини эвакуация қилиш бўйича махсус комиссия бошиданоқ эвакуация учун муҳлатни шу муддатгача белгилаган. Кейин эса чет эл фуқаролари учун визасиз тартиб тугайди ва жарималар қўлланиши бошланади.
Ўзбекистоннинг Украинадаги элчихонаси фуқароларга Молдовага бориш осонроқ бўлса, ушбу вариантни кўриб чиқишлари лозимлигини билдирганди. Ушбу фуқароларнинг кейинчалик ватанига эвакуация қилинишини ташкил этиш учун элчихона томонидан уларнинг рўйхати ва маълумотлар базаси шакллантирилмоқда.
Украина фуқаролигини олган ёки Ўзбекистонликлар билан оила қурган бошқа давлат фуқаролари ушбу давлатдан пуллик асосда эвакуация қилиниши мумкин.
Изоҳ (0)