Buxoro viloyatidagi mavjud 16 ming 540 nafar aliment to‘lovchining 215 nafari ayol kishi ekani ma’lum qilindi. Bu haqda Bosh prokuratura huzuridagi MIB viloyat boshqarmasi tomonidan “Aliment majburiyatlarini ijro etish va nazorat qilish” mavzusida o‘tkazilgan matbuot anjumanida ma’lum qilindi, deya xabar berdi “Daryo” muxbiri.
“Bu ayollarning ma’lum qismigina yurtimizda bo‘lishsa, afsuski, aksariyati pul ishlash maqsadida turli xorij davlatlari, jumladan, Turkiya, Dubayga chiqib ketgan. Ular orasida sha’nini bulg‘ab tirikchilik qilayotganlar yo‘q, deya olmaymiz. Ammo, buning uchun men ayollarni ayblamoqchimasman. Turmush qiyinchiliklari, hayot zarbalari-yu erkagining boqimandaligi tufayli shunga majbur bo‘lgan. Bunday ‘ish’ izlab ketgan ayollar soni hisob qilinganida O‘zbekiston bo‘yicha Buxorodagi ko‘rsatkich yuqori bo‘lgan. Men buni buxorolik erkaklar uchun uyat, orsizlik deb bilaman”, — deydi MIB viloyat boshqarmasi boshlig‘i Alijon Qilichev.
Anjumanda ta’kidlanishicha, uzoq muddat davomida aliment to‘lashdan bo‘yin tovlab kelgan 379 nafar, ijro hujjatini ijro etmagan 1349 nafar qarzdor ma’muriy, aliment to‘lovlarini qasddan amalga oshirmagan 39 nafar shaxs esa jinoiy javobgarlikka tortilgan.
“Ijro harakatlari jarayonida noma’lum sabablar bilan yashiringan va ijrodan bo‘yin tovlagan 361 nafar qarzdorga nisbatan qidiruv amalga oshirilib, 187 nafari topilgan va ularga nisbatan jazo qo‘llanilgan. 4418 nafar aliment to‘lovchi ishga joylashtirilgan. 1989 ta oila yarashtirilgan”, — deydi MIB viloyat boshqarmasi boshlig‘i Alijon Qilichev.
Izoh (0)