UFC sobiq chempioni 20 yilga qamalishi mumkin. U 14 yoshli qiziga tegajog‘lik qilgan shaxsga qarata o‘q uzgan

Og‘ir vazn toifasida UFC sobiq chempioni Keyn Velaskes San-Xosedagi qurolli otishma sababli hibsga olindi.

San-Xose shahrida bo‘lib o‘tgan otishmadan so‘ng bir kishi hayoti uchun xavfli bo‘lmagan jarohat bilan shifoxonaga yotqizilgan, ikkinchisi esa hibsga olingan.

Quroldan o‘q otgan shaxs sobiq UFC chempioni Keyn Velaskes ekanligi aniqlandi. U o‘sha tunni qamoqxonada o‘tkazgan. Velaskesga qotillikka suiqasd qilish ayblovi qo‘yilmoqda. Keyn xususiy bolalar maktabiga egalik qiladigan 43 yoshli Garri Gulartening mashinasiga bir necha bor o‘q uzgan. Mashina ichida Gulartening onasi va o‘gay otasi bo‘lgan.

Politsiya hisobotiga ko‘ra, Gularte voyaga yetmagan qizga nisbatan tegajog‘lik qilgani yuzasidan “14 yoshga to‘lmagan bolaga nisbatan axloqsiz va nomaqbul harakatlar qilish”da gumonlangan. Ammo prokurorning e’tirozlariga qaramasdan, sudlanuvchi garov evaziga ozodlikka chiqarib yuborilgan. Gularte tegajog‘lik qilgan qiz Velaskesning qizi bo‘lgan.

Santa-Klara (Kaliforniya) okrugi prokurori Jeff Rozen sportchini jiddiy jazo kutib turgani haqida gapirdi.

“Janob Velaskes adolat o‘rnatishni o‘z qo‘liga olishga qaror qilib, jamoatchilik va mashinada o‘tirganlarga xavf tug‘dirgani fojiadir. Bu zo‘ravonlik uning oilasiga yanada ko‘proq azob-uqubatlarni keltirib chiqaradi”, — deydi Rozen.

Velaskes aybdor deb topilsa, sud uni 20 yillik qamoq jazosiga hukm qilishi mumkin.

Velaskesning bu qilmishi jamoatchilikda turli reaksiyalarni keltirib chiqardi. Sobiq MMA jangchisi Ben Askren o‘z Twitter sahifasida Keynning hibsga olinishiga munosabat bildirdi.

Farzandinga zo‘ravonlik qilgan odamni otib tashlab bo‘lmaydigan mamlakatda yashashni xohlamayman. Keynga erkinlik.

Ben Askren, sobiq MMA jangchisi

Keyn, sen haqiqiy erkaksan. Seni yaxshi ko‘ramiz va doim sen bilan qolamiz.

Habib Nurmagomedov, sobiq UFC chempioni