UFC собиқ чемпиони 20 йилга қамалиши мумкин. У 14 ёшли қизига тегажоғлик қилган шахсга қарата ўқ узган

Оғир вазн тоифасида UFC собиқ чемпиони Кейн Веласкес Сан-Хоседаги қуролли отишма сабабли ҳибсга олинди.

Сан-Хосе шаҳрида бўлиб ўтган отишмадан сўнг бир киши ҳаёти учун хавфли бўлмаган жароҳат билан шифохонага ётқизилган, иккинчиси эса ҳибсга олинган.

Қуролдан ўқ отган шахс собиқ UFC чемпиони Кейн Веласкес эканлиги аниқланди. У ўша тунни қамоқхонада ўтказган. Веласкесга қотилликка суиқасд қилиш айблови қўйилмоқда. Кейн хусусий болалар мактабига эгалик қиладиган 43 ёшли Гарри Гулартенинг машинасига бир неча бор ўқ узган. Машина ичида Гулартенинг онаси ва ўгай отаси бўлган.

Полиция ҳисоботига кўра, Гуларте вояга етмаган қизга нисбатан тегажоғлик қилгани юзасидан «14 ёшга тўлмаган болага нисбатан ахлоқсиз ва номақбул ҳаракатлар қилиш»да гумонланган. Аммо прокурорнинг эътирозларига қарамасдан, судланувчи гаров эвазига озодликка чиқариб юборилган. Гуларте тегажоғлик қилган қиз Веласкеснинг қизи бўлган.

Санта-Клара (Калифорния) округи прокурори Жефф Розен спортчини жиддий жазо кутиб тургани ҳақида гапирди.

«Жаноб Веласкес адолат ўрнатишни ўз қўлига олишга қарор қилиб, жамоатчилик ва машинада ўтирганларга хавф туғдиргани фожиадир. Бу зўравонлик унинг оиласига янада кўпроқ азоб-уқубатларни келтириб чиқаради», — дейди Розен.

Веласкес айбдор деб топилса, суд уни 20 йиллик қамоқ жазосига ҳукм қилиши мумкин.

Веласкеснинг бу қилмиши жамоатчиликда турли реакцияларни келтириб чиқарди. Собиқ MMA жангчиси Бен Аскрен ўз Twitter саҳифасида Кейннинг ҳибсга олинишига муносабат билдирди.

Фарзандинга зўравонлик қилган одамни отиб ташлаб бўлмайдиган мамлакатда яшашни хоҳламайман. Кейнга эркинлик.

Бен Аскрен, собиқ MMA жангчиси

Кейн, сен ҳақиқий эркаксан. Сени яхши кўрамиз ва доим сен билан қоламиз.

Ҳабиб Нурмагомедов, собиқ UFC чемпиони