“Everton” Alisher Usmonovning kompaniyasi bilan hamkorlikni to‘xtatdi. Bu klubga qanday ta’sir ko‘rsatadi?

“Everton” tadbirkor Alisher Usmonovning asosiy aktivlaridan biri bo‘lgan USM Holdings bilan hamkorlikni to‘xtatdi.

USM o‘zi nima?

USM — tadbirkorning yetakchi holdingi bo‘lib, uning asosiy aktivlari: “Megafon” uyali aloqa operatoridan tortib, butun sayyora bo‘ylab temir rudasi va mis mahsulotlarini ishlab chiqarish, yetkazib berish bozorining eng yirik ishtirokchilaridan biri bo‘lgan Metalloinvest’gacha bo‘lgan kompaniyalar hisoblanadi.2012-yilda Usmonov va uning hamkorlari tomonidan 20 yildan ortiq vaqt davomida sarmoya kiritib kelingan Twitter, Uber, Facebook va Xiaomi kabi loyihalarini birlashtirish uchun USM’ga asos solingan. 2017-yilda USM “Everton” bilan yiliga 12 million funtlik shartnoma imzolaydi. Shundan so‘ng kompaniya “Everton”ning eng yirik hamkoriga aylanadi: “Gudison Park”da “Megafon” reklamasi paydo bo‘ladi.

• 2020-yil yanvar oyida USM 30 million funtga “Everton”ning yangi stadioniga nom qo‘yish huquqini sotib oldi. Usmonov nom qo‘yishni emas, u uchun bo‘lib o‘tadigan savdoda qatnashish imkoniyatiga ega bo‘lishni xohlagandi.
• Keyinroq “Megafon” va Yota kompaniyalari “Everton”ning ayollar jamoasi rasmiy homiysiga aylandi: bitim narxi oshkor etilmadi, biroq klub bu Angliya ayollar futboli tarixidagi eng yaxshi kelishuvlardan biri ekanligini ta’kidladi.
• O‘sha yili “Everton” yillik daromadi 63,7 million funtni tashkil qilgani bilan faxrlangandi. Mish-mishlarga qaraganda bunday raqamlar USM nom uchun to‘lagan 30 million funt evaziga oshgan bo‘lishi mumkin.

Usmonovning ta’siri shunchalik kattamidi?

• Usmonov rasmiy ravishda hech qachon klub aksiyadorlari ro‘yxatida bo‘lmagan, lekin uning “Everton” xo‘jayini Farhod Moshiri bilan aloqalari doim loyihaga ta’sir qilgan: tadbirkor nafaqat sarmoya kiritgan, balki muhim qarorlarni ham qabul qilgan. The Athletic’ning yozishicha, Rafael Benites bilan muzokaralar aynan Usmonovning yaxtasida bo‘lib o‘tgan.
• Yana ham yangiroq misol bor. Usmonovsiz Frenk Lempard bilan muzokaralar ijobiy yakun topmasdi, deb yozadi Mirror gazetasi. Amaldagi xo‘jayin jim o‘tirgan vaqtida, tadbirkor Frenkka faol ravishda savollar berib turgan.
• Usmonov Moshiri bilan 1989-yilda Middlesex Holdings kompaniyasining eronlik xo‘jayini orqali tanishgan. Moshiri rossiyalik tadbirkorning ishonchini qozongan va uning shaxsiy maslahatchisiga aylangan. Hozirda u USM Holdings direktorlar kengashi raisi lavozimida ham faoliyat olib boradi.
• 2016-yilda Moshiri o‘z ulushini sotib, klubning barcha qimmatli qog‘ozlarini Usmonovga topshirgan. Eronlik tadbirkor daromad evaziga “Everton”ning 49,9 foiz aksiyasini sotib olgan, BBC xabariga ko‘ra, bu Usmonovning shaxsiy sovg‘asi bo‘lgan. Farhod barcha muhim qarorlarni rossiyalik tadbirkor orqali amalga oshirgan bo‘lishi mumkin.

“Everton”ni nima kutmoqda?

Klub tavakkal qilyapti.

• “Everton”ning so‘nggi 3 yildagi qarzi 265 million funt sterlingni tashkil qiladi, bu liga belgilagan 105 million funtdan ancha ko‘p.
• Hozirda klub APL rahbariyatidan yordam olishi mumkin, lekin imkon qadar tezroq yangi investor topishi lozim.
• Eng muhimi, stadionga nom qo‘yish huquqi sotilmagan, shuning uchun Usmonov 30 millionni qaytarishni talab qila olmaydi. Klub yo‘qotishlarga tayyor ekanini ta’kidlamoqda, ammo USM’ning rad etilishi moliyaviy ahvolga jiddiy ta’sir ko‘rsatadi.
• Usmonovning ishonchli odami sifatida Moshiriga nisbatan hozircha hech qanday harakat yo‘q.

“Everton” aksionerlari raisi Jon Bleyn bu masala yaqin vaqt ichida hal qilinishini aytib o‘tdi.