Qatar poytaxti Doha shahrida sport gimnastikasi bo‘yicha Jahon kubogining ikkinchi bosqichi bo‘lib o‘tmoqda. Ushbu musobaqada dunyoning 30 ta davlatdan kelgan gimnastlar g‘oliblik uchun bahs olib bormoqda, deb yozadi MOQ matbuot xizmati.
Musobaqaning tayanib sakrash mashqlarining final bahslarida 46 yoshli Oksana Chusovitina eng yaxshi natija qayd etdi va yakunda oltin medalga sazovor bo‘ldi. Uning yakuniy ko‘rsatkichi 13,433 ballni tashkil qildi.
Ushbu yo‘nalishda 2-o‘rin umumiy 13,150 ball jamg‘argan vengriyalik Maria Bachkayga nasib etdi. Rossiyalik 16 yoshli sportchi Viktoriya Listunova esa 13,133 ball bilan kuchli uchlikka yakun yasab berdi.
O‘zbek sporti afsonasi bo‘lgan Oksana Chusovitina Olimpiada o‘yinlarida 8 marotaba qatnashgan tarixdagi yagona gimnastikachi hisoblanadi. Shuningdek, u sport gimnastikasi bo‘yicha 3 karra Jahon chempionidir.
Chusovitina Tokio Olimpiadasidan keyin faoliyatini yakunlashini ma’lum qilgandi. Biroq 2021-yilning oktabr oyida katta sportga qaytganini e’lon qildi.
“Osiyo o‘yinlari—2022 ga tayyorgarlikni boshlashga qaror qildim. Faoliyatimni O‘zbekiston uchun birorta ham medal qo‘lga kiritmay turib yakunlay olmayman”, — degandi o‘shanda Chusovitina.
Eslatib o‘tamiz, 2022-yilgi Osiyo o‘yinlari sentabr oyida bo‘lib o‘tadi.
Izoh (0)