Tashqi ishlar vazirligi rasmiy vakili Yusup Kabuljanov fuqarolardan Ukrainadagi vaziyat, o‘zbekistonliklarni evakuatsiya qilish borasidagi savollarga javob berib kelmoqda. U Polsha aeroportida O‘zbekiston fuqarolari orasida kelib chiqqan janjal va mojaro holatlari to‘g‘risida ma’lumot berdi.
Qayd etilishicha, vazirlik rasmiy vakiliga “Polsha aeroportlarida O‘zbekiston fuqarolari orasida samolyotga chiqish uchun janjal va mojaro holatlari yuzaga kelgani haqida ma’lumotlar tarqalmoqda. Bunga qanday izoh bera olasiz?” degan savol kelib tushgan.
Uning ta’kidlashicha, “Karchova” nazorat-o‘tkazish punkti rahbariyati qochoqlar, jumladan, boshqa davlatlar fuqarolari soni ko‘paygani sababli to‘planish nuqtasini bosqichma-bosqich bo‘shatishni so‘ralmoqda. Bu so‘rovlarni inobatga olib, kuniga 3 marotabagacha tashkil etilayotgan maxsus reyslarni o‘z vaqtida to‘ldirish uchun O‘zbekiston fuqarolari muntazam ravishda avtobuslarda Katovitse aeroportiga olib borilmoqda.
“Shu sababdan hamda ushbu aeroportdan boshqa davlatlar fuqarolari ham foydalanayotgani natijasida odamlarning to‘planishi kuzatilmoqda. Biroq subyektiv omil ham mavjud. Har bir inson birinchi bo‘lib uchib ketishni xohlayotgani tufayli tartibsizliklar kuzatilmoqda”, — deyiladi xabarda.
Elchixona iltimosiga binoan shahar ma’muriyati Katovitse aeroporti binosiga tartibli o‘tish va yo‘lovchilarni ro‘yxatga olishni tashkil qilgan. Tartibni politsiya nazorat qilmoqda.
Shuningdek, mamlakatning Polshadagi elchixonasi iltimosiga binoan faqat O‘zbekiston fuqarolari uchun aeroportda issiq ovqat tashkil etilgan.
Mavzuga doir:
- “Himoyalangan bunkerlarda qolish tavsiya etiladi”. TIV Ukrainaning ayrim shaharlaridan fuqarolarni evakuatsiya qilish harbiy harakatlar tugagach amalga oshirilishini ma’lum qildi
- Polsha orqali evakuatsiya qilinayotgan o‘zbekistonliklar 15-martgacha mamlakatni tark etishi kerak — TIV rasmiy vakili
- O‘zbekiston Kiyevdagi elchixonasini ko‘chirish masalasini ko‘rib chiqmayapti — TIV
Izoh (0)