Rossiya va Ukraina o‘rtasida kechayotgan og‘ir siyosiy vaziyat media va kino sohasiga ham sezilarli ta’sir qildi. Jumladan, Netflix rus ijodkorlari tomonidan taqdim etilgan barcha loyihalar ustida ishlarni to‘xtatdi. Bundan tashqari, The Walt Disney Company, Warner Bros, Sony Pictures va Universal Pictures kabi yirik kinokompaniyalar Rossiyada o‘tkazilishi kutilayotgan premyeralarni bekor qildi. “Daryo” shular haqida so‘z yuritadi.
Xabarlarga ko‘ra, Netflix striming platformasi bosh rolda Svetlana Xodchenkova ishtirok etgan “Anna K” seriali, Aleksandr Petrov ishtirokidagi yana bir serial, Yura Borisov qatnashgan “Arzirli hech nima” (“Nichego osobennogo”) va Darya Jukning “Biroq” (“Zatо”) kriminal trilleri va boshqa loyihalar namoyishini bekor qilgan.
Avvalroq platforma Rossiyaning “Birinchi kanal”, “NTV”, “Spas” va boshqa markaziy telekanallari translyatsiyasidan ham bosh tortgandi. 2021-yil dekabr oyida 100 mingdan ortiq rossiyalik foydalanuvchi Netflix’ga obuna bo‘lgach, Roskomnadzor ushbu platformani audiovizual reyestrga qo‘shgan va Rossiya qonunchiligiga muvofiq unga Rossiya telekanallarini ko‘rsatish majburiyatini yuklagan. Lekin, rasmiy bayonotga ko‘ra, Netflix bu talabni bajarish niyatida emas.
Birinchi bo‘lib Disney studiyasi Rossiyaga prokatni bekor qildi. 10-mart kuni Pixar’ning “Qizarib ketyapman” (I’m blushing) multfilmi premyerasi o‘tkazilishi kutilayotgandi.
5-mayda Marvel’ning “Doktor Strenj telbalik multidunyosida” (Doctor Strange in the multiverse of madness) blokbasteri, 16-iyunda esa Bazz Layter haqidagi “O‘yinchoqlar hikoyasi” nomli spin-off Rossiya katta ekranlariga uzatilishi kerak edi. Lekin bu premyeralar taqdiri hozircha noma’lumligicha qolmoqda.
Disney’dan so‘ng Warner studiyasi o‘z ishlarini Rossiya hududida namoyish qilishdan bosh tortdi. 3-mart kuni yilning eng kutilgan filmlaridan biri — Mett Rivzning Robert Pattinson ishtirokidagi “Betmen” filmi prokatga chiqishi rejalashtirilgandi. Boshqa premyeralarni bekor qilish haqida hozircha gap yo‘q. Biroq aprel oyida mashhur “Afsonaviy maxluqlar” (Fantastic beasts) faranshizasining uchinchi qismi chiqishi kutilayotgandi. Oldingi ikki qism Rossiyada 20 million dollardan ortiqroq mablag‘ yig‘gan.
Warner o‘z bayonotida shunday deydi:
Biz vaziyatni kuzatishda davom etamiz va fojia tez orada tinch yo‘l bilan hal qilinishini kutamiz.Sony ham mart oxiriga mo‘ljallangan, Jared Let0 ishtirokidagi “Morbius” kartinasini Rossiya prokatlariga chiqarmaslik haqida ma’lum qildi. Kompaniya bayonotida boshqa kechiktirishlar haqida (hozircha) gapirilmagan.
Universal va Paramount ham, o‘z navbatida, rejalashtirgan premyeralarni keyinga surgan. Universal tomonidan 24-mart kunga rejalashtirilgan “Yomon yigitlar” (The bad guys) multfilmi va Maykl Beyning 7-aprelga mo‘ljallangan “Tez yordam” (Ambulance) filmi endi Rossiyada tomoshabinlar e’tiboriga havola etilmaydi.
Hollywoodreporter xabariga ko‘ra, Amerika va uning ittifoqchilari Rossiyani o‘z kontentidan mahrum qilish niyatida. Bu faqat siyosat bilan bog‘liq emas. Studiyalar Rossiyaning global SWIFT bank tizimidan uzilishi munosabati bilan shunday qilishi mumkin (va bu harakat allaqachon boshlandi). SWIFT bo‘lmasa, studiyalar Rossiya distribyutorlaridan pul olishi juda qiyinlashib ketadi. Xorijga valyuta olib chiqishga ham vaqtinchalik cheklov qo‘yilgan. Bundan kelib chiqadiki, barcha G‘arb filmlari yaqin kelajakda Rossiya kinoteatrlaridan g‘oyib bo‘lishi mumkin.
Bu yo‘qotish butun repertuarning, taxminan, 80 foizini tashkil qiladi. Premyeralar bekor qilinishi fonida rossiyaliklar yangi rus filmlarini belgilangan sanadan oldinroq chiqarishni va eskilarini takroran namoyish qilishni rejalashtirmoqda.
“Sentral partnyorship” distribyutori 3-martdan 5-martgacha Milosh Bikovich va Kristina Asmus ishtirokidagi “Turmush qurmoqchiman” komediyasi (“Хоchu zamuj”) premyerasini o‘tkazmoqchi. Rossiya kinoprokatini qo‘llab-quvvatlash maqsadida “Qarol” (“Хоlop”, 2019), “Yuqoriga harakat” (“Dvijeniye vverx”, 2017) va “Dada” (“Batya”, 2021) kartinalari ekranga qaytarilgan.
Izoh (0)