Toshkentda fuqarolarni 455 mln so‘mga chuv tushirgan shaxs 10 yilga qamaldi

Toshkentda tanishlaridan go‘sht mahsulotlarini qo‘lga kiritib, uning pulini o‘z ehtiyojlari uchun sarflab yuborgan shaxsga hukm o‘qildi, deb xabar beradi Oliy sud matbuot xizmati.

Ma’lum qilinishicha, muqaddam besh marta sudlangan shaxs qoramollarni so‘ydirilgan holda sotib, uning egasiga va’da qilgan pullarni bermasdan, aldab yurgan. Shuningdek, tadbirkorlik faoliyati davomida 25 million so‘mlik olma va limonni pulini bermasdan kelgan, bir tanishiga esa avtomobil sotib olib berishni va’da qilib, 6 ming dollar olgan.

“Reklamadan ko‘rib, 1Xbet o‘yiniga kirib qoldim. O‘ynab-o‘ynab, 40 ming dollardan ortiq pul yutqazib qo‘ydim. Qimor o‘yini 10 yildan beri o‘ynayman, juda ko‘p pul yutqizganman. Pullarimni qaytarib olaman degan maqsadda qayta-qayta o‘ynayverganman”, — deydi ayblanuvchi.

Mazkur shaxs umumiy hisobda fuqarolarning 455 million so‘m miqdordagi pullarini qo‘lga kiritib, o‘z ehtiyojlariga sarflab yuborgan.

Ayblanuvchi jinoyat ishlari bo‘yicha Mirzo Ulug‘bek tuman sudi tomonidan Jinoyat kodeksining 168- (firibgarlik) va 227- (hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) moddalarida nazarda tutilgan jinoyatlarni sodir etganlikda aybdor deb topilib, unga nisbatan 10 yil muddatga ozodlikdan mahrum qilish jazosi tayinlangan. Jazoni qattiq tartibli koloniyalarda o‘tash belgilangan.

Avvalroq Toshkentda mashina olib berish uchun 72 nafar fuqarodan 362 mln olgan korxona rahbari ushlangani, Toshkentda xorij kompaniyasiga tegishli 152 ming dollarlik yuk konteynerlarini qo‘lga kiritgan shaxslar aniqlangani, Farg‘onada fuqaroga telefonlar olib berishini aytib, 10 ming dollar olgan shaxs qo‘lga olingani to‘g‘risida xabar berilgandi.