O‘zbekiston va Pokiston hukumatlari o‘rtasida tranzit savdosi to‘g‘risidagi bitim tasdiqlandi

“Xalqaro shartnomani tasdiqlash to‘g‘risida”gi prezident qarori qabul qilindi, deb xabar beradi Telegram’dagi “Huquqiy axborot” kanali.

Qarorga muvofiq, O‘zbekiston hamda Pokiston hukumatlari o‘rtasida tranzit savdosi to‘g‘risidagi bitim (2021-yil 15-iyulda Toshkent shahrida imzolangan) tasdiqlangan.

Investitsiya va tashqi savdo vazirligi, Transport vazirligi va Davlat bojxona qo‘mitasi ushbu xalqaro shartnomani amalga oshirish uchun mas’ul vakolatli organlar etib belgilangan.

Vazirlar Mahkamasi hamda tegishli vazirlik va idoralarning rahbarlari mazkur xalqaro shartnoma kuchga kirgandan keyin O‘zbekistonning majburiyatlari bajarilishini ta’minlaydi.

Eslatib o‘tamiz, 2021-yilning iyulida Pokiston bosh vaziri Imron Xon O‘zbekistonga tashrif buyurib, prezident Shavkat Mirziyoyev bilan tor va kengaytirilgan tartibda muzokaralar o‘tkazgan edi. Tashrif doirasida imzolangan 8 ta, xususan, tranzit va savdo to‘g‘risidagi hujjat almashilgandi.