Toshkentda tanasini armatura teshib o‘tgan 17 yoshli yigitning hayoti saqlab qolingani to‘g‘risida xabar berilgandi. SSV matbuot xizmatining ma’lum qilishicha, 24-fevral kuni bemorning ahvoli yaxshiligi hisobga olinib, uyiga ketishga ruxsat berildi.
2021-yilning 20-dekabr kuni soat 11:00 larda 17 yoshli R.S. og‘ir ahvolda va hushsiz holda shifoxonaga olib kelingan. Bemor tanasiga qurilish jarayonida ikkinchi qavatdan yiqilib tushishi oqibatida diametri 15 millimetrlik ikkita armatura bo‘lagi kirib ketgan.
Respublika shoshilinch tibbiy yordam ilmiy markazi qabul bo‘limida bir qancha mutaxassislar ko‘rigidan so‘ng bemorning bosh miya, bo‘yin, ko‘krak va bel-umurtqa sohalari, ko‘krak qafasi, qorin bo‘shlig‘i a’zolari MSKT qilingan. Shuningdek, qorin bo‘shlig‘i va ko‘krak qafasi ultratovush tekshiruvidan o‘tkazilgan.
Aniqlanishicha, metall parchasi bemor ko‘krak qafasining o‘ng orqa yuzasi, 7 va 9-qovurg‘alari orasidan kirib, 6-ko‘krak umurtqasini teshib o‘tgan va orqa miya ezilishiga sabab bo‘lgan. So‘ngra o‘ng o‘mrovosti arteriyasi tagidan o‘tib, bosh suyagi miya asosining o‘rta chuqurchasini teshib kirgan. Bosh miya o‘rta darajada lat yegan.
Bundan tashqari, o‘ng chakka suyagi va orqa miyaning ochiq, teshib o‘tgan jarohati, 6-ko‘krak umurtqasining maydalanib sinishi kabi o‘ta og‘ir shikastlanishlar bemor hayotiga xavf solib turgan.
“Markazning kardioxirurg, neyroxirurg, torokal va umumiy jarroh, travmatolog, anesteziolog va reanimatolog kabi 10 dan ortiq eng malakali mutaxassislari tomonidan 5 soatdan ziyod davom etgan amaliyotda kam uchraydigan murakkab jarrohlik operatsiyasi muvaffaqiyatli o‘tkazilib, natijada bemorning hayoti saqlab qolingan”, — deyiladi xabarda.
Izoh (0)