“Sudya moddani xato qo‘llamoqda”. Alisher Qodirov Toshkentda xodimlariga namoz o‘qish uchun sharoit yaratib bergan rahbar jarimaga tortilgani haqida

Toshkent shahri Yakkasaroy tumanida ishxonasida xodimlariga namoz o‘qish uchun sharoit yaratib bergan rahbar 21,6 million so‘m miqdorida jarimaga tortilgani xabar qilingandi. “Milliy tiklanish” demokratik partiyasi markaziy kengashi raisi Alisher Qodirov holatga munosabat bildirdi.

U o‘z munosabatida amaldagi qonunchilik normalarida ibodat qilganlik va ibodat uchun sharoit yaratib berganlik uchun hech qanday javobgarlik turi yo‘q ekanini qayd etgan.

“1998-yil 1-mayda qabul qilingan ‘Vijdon erkinligi va diniy tashkilotlar to‘g‘risida’gi qonunning 14-moddasida amalga oshirish joyi cheklangan amallar qatorida diniy marosimlar bilan birga ibodat ham ko‘rsatilgan. Shuningdek, 2021 yil, 5-iyulda qabul qilingan yangi tahrirdagi ‘Vijdon erkinligi va diniy tashkilotlar to‘g‘risida’gi qonunning 7-moddasida ‘Milliy tiklanish’ DP fraksiyasining tashabbusi bilan joy bo‘yicha cheklovlar belgilangan amallar qatoridan ibodat so‘zi olib tashlangan.

Demak, amaldagi qonunda ibodat joyi uchun cheklov belgilanmagan. Albatta, ibodat odobiga rioya qilish majburiyati muhokama uchun mavzu emas.

Sudya ibodat uchun sharoit yaratgan Farhod Rahmonovga nisbatan Ma’muriy javobgarlik to‘g‘risidagi kodeksning 201-moddasi ikkinchi qismi bilan jarimani xato qo‘llamoqda. Modda ibodat yoki ibodatga sharoit yaratganlik uchun emas, ‘diniy marosim’ o‘tkazish talabini buzganlik uchun qo‘llanadi.

Farhod Rahmonov sud qarori ustidan belgilangan tartibda shikoyat qilishi mumkin.

Qolaversa, inson huquq va erkinliklari ustuvor deb hisoblanayotgan mamlakatimizda e’tiqod qiluvchilarni ibodat amallari uchun, butun dunyoda keng qo‘llanayotgan amaliyot sifatida, jamoat joylarida ham qulay sharoit yaratib berilishi kerak”, — deydi Qonunchilik palatasi spikerining o’rinbosari.