Sirdaryo viloyati hokimi G‘ofur Mirzayev “Xalq ta’limi homiysi” ko‘krak nishoni bilan taqdirlandi

Xalq ta’limi vazirligi rahbariyati Sirdaryo viloyati hokimligi tomonidan maktablarni rivojlantirish borasida amalga oshirilgan ishlar bilan tanishdi, deya xabar bermoqda vazirlik matbuot xizmati.

Qayd etilishicha, 2022-yilning 19-fevral kuni xalq ta’limi vaziri Baxtiyor Saidov Sirdaryo viloyatiga bordi.

Vazir viloyat hokimi bilan birgalikda Sayxunobod tumanidagi “Sirdaryo-Politex” paxta to‘qimachilik klasterida bo‘lib, ip va kalava ishlab chiqarish fabrikasining ochilish marosimida ishtirok etdi. Mazkur jarayonda Sirdaryo viloyati hokimligi tomonidan maktablarni moddiy-texnik bazasini mustahkamlash borasida amalga oshirilgan ishlar to‘g‘risida ma’lumotlar berildi.

Korxonaning ochilish marosimida hokim tomonidan maktablarga texnika vositalari va musiqa cholg‘u asboblari taqdim etildi.

So‘ngra Guliston shahridagi 8-maktabda dzyudo sport turi bilan shug‘ullanish uchun ixtisoslashtirilgan zamonaviy sport zalining ochilish marosimi bo‘lib o‘tdi. Unda mahalliy hokimlik, vazirlik hamda Dzyudo federatsiyasi mas’ullari ishtirok etdi.

Shuningdek, vazirlik mutasaddilari ko‘zi ojiz bolalar maktab-internatida bo‘lib, yangi binoda yaratilgan sharoitlar bilan yaqindan tanishdi. Shu kuni yangi qurib ta’mirdan chiqarilgan ta’lim muassasasining topshirish marosimi bo‘lib o‘tdi.

Ma’lum qilinishicha, 2021-yil davomida Sirdaryo viloyatidagi 313 ta maktab mahalliy byudjet hisobidan 1 trillion 796 milliard 100 million so‘m mablag‘ hisobiga sport jihozlari bilan ta’minlangan.

Viloyat xalq ta’limi boshqarmasi tasarrufidagi maktablarni xorijiy tillarni o‘qitish uchun zarur bo‘lgan adabiyotlar, asbob-uskunalar, zamonaviy axborot texnologiyalari bilan ta’minlash uchun mahalliy budjetdan 1 milliard so‘m mablag‘ ajratilgan.

Mahalliy budjetdan 250 million so‘m mablag‘ doirasi Sayxunobod tumanidagi 41 ta maktabiga turli musiqa asboblari yetkazib berilgan. 2,6 milliard so‘m mablag‘ doirasi 26 ta maktab kompyuter sinf jamlanmalari bilan ta’minlangan.

Xalq ta’limi vazirligidan Sirdaryo viloyati hokimligi tomonidan maktablarni rivojlantirish borasida amalga oshirilgan ijobiy ishlari uchun viloyat hokimi G‘ofur Mirzayevga “Xalq ta’limi homiysi” ko‘krak nishoni topshirildi.