Сирдарё вилояти ҳокими Ғофур Мирзаев «Халқ таълими ҳомийси» кўкрак нишони билан тақдирланди

Халқ таълими вазирлиги раҳбарияти Сирдарё вилояти ҳокимлиги томонидан мактабларни ривожлантириш борасида амалга оширилган ишлар билан танишди, дея хабар бермоқда вазирлик матбуот хизмати.

Қайд этилишича, 2022 йилнинг 19 февраль куни халқ таълими вазири Бахтиёр Саидов Сирдарё вилоятига борди.

Вазир вилоят ҳокими билан биргаликда Сайхунобод туманидаги «Сирдарё-Политех» пахта тўқимачилик кластерида бўлиб, ип ва калава ишлаб чиқариш фабрикасининг очилиш маросимида иштирок этди. Мазкур жараёнда Сирдарё вилояти ҳокимлиги томонидан мактабларни моддий-техник базасини мустаҳкамлаш борасида амалга оширилган ишлар тўғрисида маълумотлар берилди.

Корхонанинг очилиш маросимида ҳоким томонидан мактабларга техника воситалари ва мусиқа чолғу асбоблари тақдим этилди.

Сўнгра Гулистон шаҳридаги 8-мактабда дзюдо спорт тури билан шуғулланиш учун ихтисослаштирилган замонавий спорт залининг очилиш маросими бўлиб ўтди. Унда маҳаллий ҳокимлик, вазирлик ҳамда Дзюдо федерацияси масъуллари иштирок этди.

Шунингдек, вазирлик мутасаддилари кўзи ожиз болалар мактаб-интернатида бўлиб, янги бинода яратилган шароитлар билан яқиндан танишди. Шу куни янги қуриб таъмирдан чиқарилган таълим муассасасининг топшириш маросими бўлиб ўтди.

Маълум қилинишича, 2021 йил давомида Сирдарё вилоятидаги 313 та мактаб маҳаллий бюджет ҳисобидан 1 триллион 796 миллиард 100 миллион сўм маблағ ҳисобига спорт жиҳозлари билан таъминланган.

Вилоят халқ таълими бошқармаси тасарруфидаги мактабларни хорижий тилларни ўқитиш учун зарур бўлган адабиётлар, асбоб-ускуналар, замонавий ахборот технологиялари билан таъминлаш учун маҳаллий бюджетдан 1 миллиард сўм маблағ ажратилган.

Маҳаллий бюджетдан 250 миллион сўм маблағ доираси Сайхунобод туманидаги 41 та мактабига турли мусиқа асбоблари етказиб берилган. 2,6 миллиард сўм маблағ доираси 26 та мактаб компьютер синф жамланмалари билан таъминланган.

Халқ таълими вазирлигидан Сирдарё вилояти ҳокимлиги томонидан мактабларни ривожлантириш борасида амалга оширилган ижобий ишлари учун вилоят ҳокими Ғофур Мирзаевга «Халқ таълими ҳомийси» кўкрак нишони топширилди.