Qo‘qonda narkodispanserda ro‘yxatda turuvchi erkak dorixona oldida qornini shisha bo‘lagi bilan tilib tashladi (video)

Ijtimoiy tarmoqlarda Farg‘ona viloyati Qo‘qon shahrida fuqaro o‘z qornini tilib, ochib tashlagani aks etgan videolavha tarqaldi. Bosh prokuratura axborot xizmati rahbari Hayot Shamsutdinov holat bo‘yicha “Daryo”ga ma’lumot berdi.

Ma’lum qilinishicha, Qo‘qon shahar IIB navbatchilik qismiga 12-fevral kuni soat 17:40 larda fuqaro M.R. (1987-yilda tug‘ilgan) Turon ko‘chasidagi dorixona oldida qorin qismini shisha bo‘lagi bilan kesib, o‘ziga tan jarohati yetkazgani haqida xabar kelib tushgan. Voqea joyi shahar prokurori boshchiligida tezkor-tergov guruhi tomonidan ko‘zdan kechirilgan.

Holatni o‘rganish davomida fuqaro shu kuni akasi tomonidan viloyat 2-sonli Narkologiya dispanseriga olib borilgani ma’lum bo‘lgan. U dispanser navbatchi shifokori tomonidan kuchli vasvasa (psixoz) holatida qabul qilinib, muassasaning ixtiyoriy bo‘limiga yotqizilgan va kerakli muolajalar qilingan. Davo muolajalarga qaramasdan, fuqaro noixtiyoriy ravishda turli harakatlarni sodir etib, bo‘lim oynalarini sindirib, o‘ziga tan jarohati yetkazgan. Dispanserda xizmat faoliyatini olib borayotgan Milliy gvardiya qo‘riqlash bo‘limi xodimlaridan uni muassasadan chiqarib yuborishini talab qilib, soat 15:00 da chiqib ketgan.

Shundan so‘ng fuqaro ijtimoiy xavfli harakatlarini sodir etishda davom etgan. Shahardagi “Aviakassa”lardan birining kirish eshigi oynasini boshi bilan urib sindirgan. Shisha bo‘laklari bilan o‘ziga tan jarohati yetkazishi haqida atrofdagi fuqarolar va huquqni muhofaza qilish xodimlariga ma’lum qilib, qorin qismiga qo‘lida bo‘lgan shisha bo‘lagi bilan jarohat yetkazgan.

Uni voqea joyidan opasi F.M. va akasi F.M. noma’lum tomonga olib ketgan.

Aniqlanishicha, fuqaro muqaddam Jinoyat kodeksining 164-moddasi 2-qismi (bosqinchilik), 165-moddasi (tovlamachilik) 1-qismi va 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi bilan bir necha bor sudlangan.

R.M. viloyat 2-sonli Narkologiya dispanserida 2020-yildan iyul oyidan beri turli narkotik va psixotrop moddalar iste’mol qiluvchi (polinarkomaniya) bemor sifatida “D” nazoratga olingan.

Holat yuzasidan hozirda Qo‘qon shahar prokuraturasi tomonidan tergovga qadar tekshiruv harakatlari olib borilmoqda.