Surxondaryo viloyatida Davlat xavfsizlik xizmati internet orqali aqidaparastlik g‘oyalarini targ‘ib qilgan shaxsni qo‘lga oldi. Bu haqda O‘zA xabar qildi.
Qayd etilishicha, DXX xodimlari tomonidan amalga oshirgan tezkor tadbir davomida fuqaro A.A.ning telefon apparati ko‘zdan kechirilgan. Fuqaro Instagram ijtimoiy tarmog‘ida profilida fuqaro Rafiq Kamolovning “benamozlik, namoz mo‘min kishining hujjati, namoz o‘qimagan odamning hujjati yo‘qligi...” mavzusidagi videoma’ruzasi va juda ko‘plab diniy mazmundagi materiallarni joylashtirib tarqatgani aniqlangan.
Tarqatilgan materiallar tekshirib ko‘rish uchun DVD+R diskka ko‘chirib olinib, Vazirlar Mahkamasi huzuridagi Din ishlari bo‘yicha qo‘mitaga yuborilgan.
Qo‘mitaning ekspertlik xulosasida A.A.ning tarqatgan videomateriallari aqidaparastlik g‘oyalari bilan yo‘g‘rilgan bo‘lib, ularni O‘zbekiston hududiga olib kirish, tayyorlash, tarqatish taqiqlanishi ma’lum qilingan.
A.A.ning harakatida Jinoyat kodeksining 244-1-moddasi 3-qismi “g” bandida nazarda tutilgan jinoyat tarkibining alomatlari mavjudligini inobatga olib hamda Jinoyat-protsessual kodeksining tegishli moddalari talablarini qo‘llab, unga nisbatan Jinoyat kodeksining 244-1-moddasi 3-qismi “g” bandi bilan jinoyat ishi qo‘zg‘atilgan.
Izoh (0)