Ижтимоий тармоқларда Фарғона вилояти Қўқон шаҳрида фуқаро ўз қорнини тилиб, очиб ташлагани акс этган видеолавҳа тарқалди. Бош прокуратура ахборот хизмати раҳбари Ҳаёт Шамсутдинов ҳолат бўйича «Дарё»га маълумот берди.
Маълум қилинишича, Қўқон шаҳар ИИБ навбатчилик қисмига 12 февраль куни соат 17:40 ларда фуқаро М.Р. (1987 йилда туғилган) Турон кўчасидаги дорихона олдида қорин қисмини шиша бўлаги билан кесиб, ўзига тан жароҳати етказгани ҳақида хабар келиб тушган. Воқеа жойи шаҳар прокурори бошчилигида тезкор-тергов гуруҳи томонидан кўздан кечирилган.
Ҳолатни ўрганиш давомида фуқаро шу куни акаси томонидан вилоят 2-сонли Наркология диспансерига олиб борилгани маълум бўлган. У диспансер навбатчи шифокори томонидан кучли васваса (психоз) ҳолатида қабул қилиниб, муассасанинг ихтиёрий бўлимига ётқизилган ва керакли муолажалар қилинган. Даво муолажаларга қарамасдан, фуқаро ноихтиёрий равишда турли ҳаракатларни содир этиб, бўлим ойналарини синдириб, ўзига тан жароҳати етказган. Диспансерда хизмат фаолиятини олиб бораётган Миллий гвардия қўриқлаш бўлими ходимларидан уни муассасадан чиқариб юборишини талаб қилиб, соат 15:00 да чиқиб кетган.
Шундан сўнг фуқаро ижтимоий хавфли ҳаракатларини содир этишда давом этган. Шаҳардаги «Авиакасса»лардан бирининг кириш эшиги ойнасини боши билан уриб синдирган. Шиша бўлаклари билан ўзига тан жароҳати етказиши ҳақида атрофдаги фуқаролар ва ҳуқуқни муҳофаза қилиш ходимларига маълум қилиб, қорин қисмига қўлида бўлган шиша бўлаги билан жароҳат етказган.
Уни воқеа жойидан опаси Ф.М. ва акаси Ф.М. номаълум томонга олиб кетган.
Аниқланишича, фуқаро муқаддам Жиноят кодексининг 164-моддаси 2-қисми (босқинчилик), 165-моддаси (товламачилик) 1-қисми ва 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 2-қисми билан бир неча бор судланган.
Р.М. вилоят 2-сонли Наркология диспансерида 2020 йилдан июль ойидан бери турли наркотик ва психотроп моддалар истеъмол қилувчи (полинаркомания) бемор сифатида «Д» назоратга олинган.
Ҳолат юзасидан ҳозирда Қўқон шаҳар прокуратураси томонидан терговга қадар текширув ҳаракатлари олиб борилмоқда.
Изоҳ (0)