Toshkentga qaytayotgan tramvay haqida poytaxtda yashovchilarning fikri qanday?

2016-yili Markaziy Osiyodagi eng qadimgi va eng yirik yengil relsli transport tizimi – Toshkent tramvaylarining 115 yillik tarixiga nuqta qo‘yilgandi. Bunga Toshkent shahrining o‘sha vaqtlardagi hokimi Rahmonbek Usmonovning tramvay yo‘nalishlari faoliyatini samarasiz deb topgani sabab bo‘lgan. Shundan so‘ng poytaxtdagi vagonlarining yaroqlilari Samarqand viloyatiga yetkazilgan edi.

O‘zbekiston prezidenti Shavkat Mirziyoyev 10-fevral kuni Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tdi. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — dedi prezident.

Toshkentga tramvayning qaytarilishi bo‘yicha poytaxtliklarning fikri qanday? Ushbu savolga javob olish maqsadida “Daryo” so‘rovnoma o‘tkazdi.

Mazkur so‘rovnomada ishtirok etgan fuqarolardan birining ta’kidlashicha, “tramvay qaytarilsa juda qulay bo‘ladi. Boshqa bir fuqaro esa “endilikda talabalar metro, avtobuslarda tiqilib, sarson bo‘lmasligini” aytdi. Fuqarolardan biri esa “tramvay tez, hozirgi zamon talablariga javob beradigan bo‘lsa ekologik tomondan ancha yaxshi bo‘lishini” bildirdi. Yana bir fuqaro esa tramvayni qaytarish bo‘yicha “kerak bo‘lsa yordam berishini” qayd etdi.

Fuqarolarning ayrimlari esa poytaxtga tramvay qaytishining tarafdori emas. Ulardan biri “tramvay ko‘chaga sig‘may qolishini” aytib, ko‘chalarni kengaytirish kerakligini ta’kidladi. Yana bir fuqaro esa “tramvay qaytarilishining keragi yo‘q ekanini” bildirib, jumladan, shunday deydi: “Tramvay yo‘lni to‘sadi, halaqit beradi. Men shu yerda tug‘ilib o‘sganman. Trolleybusni ham, tramvayni ham ko‘rganman. Trolleybus simidan chiqib ketardi, tramvay esa tok yo‘q bo‘lsa navbatda turib qoladi”. Boshqa bir fuqaro esa “tramvayning ‘taqir-tuqur’ ovozi eshitilishini” ta’kidladi.

2016-yilning 2-may kuni Toshkentda harakatlanayotgan so‘nggi tramvay yo‘nalishi — “Beshqayrag‘och” dahasi va Ippodrom o‘rtasida qatnovchi 17-yo‘nalish yopilgandi.

Shavkat Mirziyoyev 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Aynan ushbu ko‘rsatuvda telejurnalist Xayrulla Nuriddinov Toshkentga tramvay qatnovini qaytarish tarafdori ekanini aytib o‘tgan edi.

“Shahar transporti mavzusi ochilganidan foydalanib, yana bir taklifni aytmoqchiman. Aholiga qulay va sifatli transport xizmatini ko‘rsatish sohasini takomillashtirish maqsadida Toshkentga tramvaylarni qaytarish kerak, menimcha. Katta va gavjum shaharga tramvay juda asqatadi. Hammamizning esimizdaku o‘sha qulay, bejirim, bir tekisda yuradigan, muhimi, ekologiyaga zarar yetkazmaydigan qadrdon tramvaylarimiz. Bilmadim, balki xato qilayotgandirman, lekin bu mening shaxsiy fikrim. Agar poytaxt mutasaddilarining o‘rnida bo‘lganimda, ana shu tashabbus bilan chiqqan bo‘lardim”, — degandi Xayrulla Nuriddinov.