Toshkent shahri Yashnobod tumanida 7-fevral kuni ko‘p qavatli uyning liftida bosqinchilik qilgan shaxs ushlandi. Bu haqda Tergov departamenti xabar qildi.
Qayd etilishicha, shu kuni soat 21:40 atrofida Tuzel 2-dahasida yashovchi X.M. (21 yoshli) uyi yaqinidagi oziq-ovqat do‘konidan chiqib, yashash xonadoniga kirish uchun lift oldiga kelgan. 7-qavat tugmasini bosgan vaqtida ortidan noma’lum shaxs kelib, pichoq bilan qo‘rqitgan. U ayolning qo‘lidagi 3,5 million so‘mlik 2 dona tilla uzukni kuch ishlatib yechib olgan.
Lift 7-qavatda to‘xtagan paytda ayol baland ovozda fuqarolarni yordamga chaqirishni boshlagan. Noma’lum shaxs liftdan chiqib, hodisa joyidan yashiringan.
Holat yuzasidan Jinoyat kodeksining 164-moddasi 2-qismi “a” bandi (qurol yoki qurol sifatida foydalanish mumkin bo‘lgan boshqa narsalarni ishlatib bosqinchilik qilish) bilan jinoyat ishi qo‘zg‘atilgan.
Olib borilgan tergov-tezkor harakatlari natijasida mazkur jinoyatni muqaddam sudlangan A.A. (49 yoshli) sodir etgani aniqlangan. Jabrlanuvchiga tegishli tilla uzuklar uning yonidan ashyoviy dalil tariqasida rasmiylashtirib olingan. A.A. protsessual tartibda ushlangan.
Hozirda tergov harakatlari davom etmoqda.
Mavzuga doir:
- Toshkentda 81 yoshli kampirni bo‘ynidan bo‘g‘ib, uyidagi pullarni o‘g‘irlab ketgan erkak ushlandi
- Farg‘onada ayol va uning voyaga yetmagan qizini skotchlab, uyidagi tilla taqinchoqlarni o‘g‘irlab ketgan jinoiy guruh qo‘lga olindi
- Qashqadaryoda pistolet va elektroshoker bilan fuqaroning pul va buyumlarini tortib olgan shaxslar ushlandi
Izoh (0)