Тошкентда лифтдаги 21 ёшли аёлга пичоқ билан таҳдид қилиб, уни тунаган шахс ушланди

Тошкент шаҳри Яшнобод туманида 7 февраль куни кўп қаватли уйнинг лифтида босқинчилик қилган шахс ушланди. Бу ҳақда Тергов департаменти хабар қилди.

Қайд этилишича, шу куни соат 21:40 атрофида Тузел 2-даҳасида яшовчи Х.М. (21 ёшли) уйи яқинидаги озиқ-овқат дўконидан чиқиб, яшаш хонадонига кириш учун лифт олдига келган. 7-қават тугмасини босган вақтида ортидан номаълум шахс келиб, пичоқ билан қўрқитган. У аёлнинг қўлидаги 3,5 миллион сўмлик 2 дона тилла узукни куч ишлатиб ечиб олган.

Лифт 7-қаватда тўхтаган пайтда аёл баланд овозда фуқароларни ёрдамга чақиришни бошлаган. Номаълум шахс лифтдан чиқиб, ҳодиса жойидан яширинган.

Ҳолат юзасидан Жиноят кодексининг 164-моддаси 2-қисми «а» банди (қурол ёки қурол сифатида фойдаланиш мумкин бўлган бошқа нарсаларни ишлатиб босқинчилик қилиш) билан жиноят иши қўзғатилган.

Олиб борилган тергов-тезкор ҳаракатлари натижасида мазкур жиноятни муқаддам судланган А.А. (49 ёшли) содир этгани аниқланган. Жабрланувчига тегишли тилла узуклар унинг ёнидан ашёвий далил тариқасида расмийлаштириб олинган. А.А. процессуал тартибда ушланган.

Ҳозирда тергов ҳаракатлари давом этмоқда.