O‘zbekiston maktablarida endi 1—2-sinf ona tili va o‘qish savodxonligi fanidan o‘quvchilarning choraklik bahosi kundalikka, yillik bahosi choraklikka qarab qo‘yilmaydi

O‘zbekiston maktablarida 2022/2023-yilgi o‘quv yilidan boshlab choraklik va yillik baholashning yangicha tizimi joriy etiladi. Bu haqda AOKAda o‘tkazilgan brifingda Respublika ta’lim markazi axborot xizmati rahbari Mohira Nurullayeva ma’lum qildi.

Qayd etilishicha, keyingi o‘quv yilidan boshlab kundalik yig‘ilgan baholar choraklik bahoga ta’sir qilmaydi. Chunki kundalik baho rivojlantiruvchi ahamiyatga ega, choraklik baho esa erishilgan marrani tekshirish uchun xizmat qiladi. Bu ikki baholashni o‘zaro qorishtirish sifatga ta’sir qiladi.

Shuningdek, yillik bahoni choraklik baholar asosida qo‘yish amaliyoti bekor qilinadi. Yil oxirida o‘qituvchi o‘quvchilar uchun qo‘yilgan minimal talabga javob bera olishini tekshirish uchun imtihon o‘tkazishi lozim. Chunki har chorakdagi baho bu minimal talabni bajara olishi yoki olmasligini yaqqol ko‘rsatib bera olmaydi.

Bahoga jazo yoki rag‘bat quroli emas, rivojlantirish vositasi sifatida qarash kerakligi tavsiya etilmoqda. Bolalarni baho bilan qo‘rqitishni bas qilish, ularga imkon qadar past baho qo‘ymaslik, toki topshiriqni yaxshi bahoga bajarib kelmaguncha baholamay turish tavsiya etiladi.

Bundan tashqari, o‘quvchiga qo‘yilgan har bir bahoga izoh-mulohaza berish talab etiladi.

“O‘quvchi olgan bahosining adolatli ekaniga ishonch hosil qilmas ekan, ta’limga nisbatan motivatsiyasi so‘nib boraveradi. Buni isbotlashining eng yaxshi usuli samarali yetkazilgan izoh-mulohazadir. O‘quvchi izoh-mulohaza orqali kamchilik va yutuqlarini yaqqol ko‘ra oladi. Keyinchalik qanday harakat qilishi kerakligi haqida xulosalar chiqarib oladi”, — deyiladi xabarda.