Buxoroda kar va zaif eshituvchilar maktabi direktori Hamza Sobirov poraxo‘rlikda ayblanib, ishdan bo‘shatilgani, oradan vaqt o‘tib esa sud qarori bilan yana ishga qaytgani to‘g‘risida xabar berilgandi. Buxoro viloyat xalq ta’limi boshqarmasining “Daryo”ga ma’lum qilishicha, ushbu maktab direktori 1-fevral kuni ishdan bo‘shatilgan.
2017-yildan beri Buxoro shahridagi 123-sonli kar va zaif eshituvchi bolalar maxsus maktab-internatini boshqarib kelgan Hamza Sobirov Bosh prokuratura huzuridagi iqtisodiy jinoyatlarga qarshi kurashish departamenti viloyat boshqarmasi taqdimnomasi bilan pedagog o‘qituvchilar va tarbiyachilarga dars soatlarini bir oylik ish haqi evaziga sotganlikda ayblanib, 2021-yilning 13-oktabr kuni lavozimidan olingan. Mazkur ishni ko‘rib chiqqan fuqarolik ishlari bo‘yicha Buxoro tumanlararo sudi esa boshqarma boshlig‘ining direktorni ishdan olish to‘g‘risidagi buyrug‘ini g‘ayriqonuniy deb topgach, direktor 2022-yil 5-yanvar kuni lavozimiga qaytgan.
Buxoro viloyat xalq ta’limi boshqarmasining ma’lum qilishicha, Buxoro shahridagi kar va zaif eshituvchi bolalar uchun ixtisoslashgan 123-maktab-internati direktori Hamza Sobirov 2022-yilning 1-fevral kuni o‘z roziligi bilan ishdan bo‘shash to‘g‘risida ariza yozgan va lavozimidan olingan. Hamza Sobirov viloyat xalq ta’limi boshqarmasi boshlig‘i buyrug‘i bilan Buxoro shahar xalq ta’limi bo‘limi kadrlar bo‘yicha inspektor-metodisti lavozimiga o‘tkazilgan.
Izoh (0)